Paniku përfshin Burrelin; ushtarët e ISIS po rrëmbejnë fëmijët. Policia: Janë informacione dashakeqe me prapavijë të errët

FOTO E PUBLIKUAR NGA QYTETARËT NË FAQEN E POLICISË SË DIBRËS

Në Burrel është përhapur paniku për shkak të pretendimeve se disa persona të veshur me uniformat e ISIS po qarkullojnë të lirë në qytet dhe po përpiqen të rrëmbejnë fëmijët.

Për këto pretendime ka reaguar edhe drejtoria e Policisë së Dibrës, e cila sqaron se ka ngritur një grup të posaçëm për të verifikuar informacionet, si dhe ka kryer veprime me metoda speciale për një javë rresht për të identifikuar personin. Në bashkëpunim me policinë e Burrelit është monitoruar gjithashtu qyteti me dron gjatë ditës dhe natës, si dhe është kontaktuar me qytetarë të shumtë, pronarët e bizneseve dhe gazetarët.

Nga tërësia e veprimeve, policia deklaron se informacioni që po qarkullon është tërësisht i pa vërtetë dhe dashakeqës, pasi nuk është evidentuar asnjë person në asnjë kamer biznesi me logo të ISIS, as nga monitorimi me dron nga një grup i posaçëm nga Drejtoria e Përgjitshme e Policisë së Shtetit si dhe nuk ka asnjë kallëzim nga qytetarët për rrëmbim personash.

“Nisur nga këto Drejtoria Vendore e Policisë Dibër dhe Policia lokale e Burrelit, shprehin keqardhje për këto disinfrmacione dashakeqe duke përhapur panik tek qytetarët. Këto informacione të pavërteta dhe tërësisht dashakeqe me prapavijë të errët kanë për qëllim të nxijnë punën e policisë dhe të sfumojnë sado pak rezultatet që Policia e Shtetit po arrin në luftë ndaj krimit të organizuar dhe krimit në tërësi”, thuhet në reagimin e uniformave blu.

Megjithatë, në faqen e Policisë së Dibrës qytetarët kanë publikuar foto të një personi të veshur me të zeza për të cilin pretendojnë se është anëtar i ISIS. Ata theksojnë se paniku nuk është përhapur kot, por kërkojnë nga autoritetet që të marrin masa përpara se të jetë shumë vonë.

Reagimi i plotë i Policisë së Shtetit:

Në lidhje me një foto që qarkullon në disa rrjete sociale ditët e fundit ku bëhet fjalë për një shtetas se dyshohet që është veshur me uniformën e ISIS dhe qarkullon në qytetin e Burrelit, si dhe dyshohet se ka dashur të rrëmbejë dy fëmijë ju informojmë se:

Menjëherë nga Drejtoria Vendore e Policisë Dibër dhe Policia Lokale Burrel, është ngritur një grup i posaçëm për të verifikuar informacionet.

Nga Grupi i posaçëm , janë kryer vëzhgime nga kamerat e bizneseve ku dyshohej se ishte filmuar personi, janë kryer veprime me metoda speciale për një javë rresht.

Është monitoruar qyteti natën dhe ditën me dron.

Po në lidhje me këtë informacion Drejtori Vendor i Policisë Dibër sëbashku me Shefin e Komisariatit të Policisë Mat, kanë kryer një analizë të hollësishme për këtë rast, si dhe kanë marrë kontakt me qytetarë të shumtë, me pronarët e bizneseve dhe me gazetarë.

Nga tërësia e veprimeve të kryera ka rezultuar se informacioni që po qarkullon është tërësisht i pa vërtetë dhe dashakeqës, pasi nuk është evidentuar asnjë person në asnjë kamer biznesi me logo të ISIS, as nga monitorimi me dron nga një grup i posaçëm nga Drejtoria e Përgjitshme e Policisë së Shtetit si dhe nuk ka asnjë kallzim nga qytetarët për rrëmbim personash.

Nisur nga këto Drejtoria Vendore e Policisë Dibër dhe Policia lokale e Burrelit, shprehin keqardhje për këto disinfrmacione dashakeqe duke përhapur panik tek qytetarët.

Këto informacione të pavërteta dhe tërësisht dashakeqe me prapavijë të errët kanë për qëllim të nxijnë punën e policisë dhe të sfumojnë sado pak rezultatet që Policia e Shtetit po arrin në luftë ndaj krimit të organizuar dhe krimit në tërësi.

Theksojmë se në qytetin e Burrelit dhe rrethin e Matit prej një viti nuk është shënuar asnjë vrasje apo ngjarje e rëndë kriminale, janë ulur ndjeshëm rastet e vjedhjes kundër pronës, si dhe nuk është konstatuar asnjë rast i kultivimit të bimëve narkotike.

Të gjitha këto tregojnë angazhim dhe seriozitet të strukturave të Policisë si dhe bashkëpunim mjaft të mirë me Komunitetin.

Policia e Shtetit garanton qytetarët se është maksimalisht e angazhuar për të garantuar rendin dhe sigurinë si dhe për të goditur me forcën e ligjit krimin e organizuar por dhe krimin në përgjithësi, si dhe fton qytetarët që të denoncojnë në numrin 112 çdo shkelje të ligjit duke garantuar anonimatin, si dhe një reagim të shpejtë e profesional të Policisë.