Prodhimi i naftës, SHBA do të lërë pas Arabinë Saudite dhe Rusinë

Shtetet e Bashkuara të Amerikës në vitet e ardhshme do ta rrisin aq shumë prodhimin e naftës sa do të lënë pas Arabinë Saudite dhe Rusinë dhe do të shndërrohen në vendin eksportues më të madh. Deklarata u bë nga drejtori i Agjencisë Ndërkombëtare të Energjisë, Fatih Birol, gjatë një konference në Uashington.

“Ata do jenë shumë afër në vitet e ardhshme, por është çështje kohe kur SHBA-ja qartazi do të jetë eksportuesja më e madhe e naftës në botë”, tha ai.

Komentet e Birol vijnë një ditë pasi Agjencia publikoi të dhënat e paraprake, që tregonin shifrat e eksporteve të naftës bruto të SHBA-së gjatë muajit qershor, e që sipas këtyre të dhënave, Uashingtoni ka kaluar dy konkurrentët e saj më të mëdhenj.

Sipas Birol, gjatë vitit 2024, SHBA-ja do të përjetojë “rritjen më të madhe të prodhimit në historinë e naftës deri më tani.

Agjencia Ndërkombëtare e Energjisë parashikon që gjatë këtij viti, SHBA-ja dp të rrisë prodhimin e naftës në 1,25 milionë fuçi në ditë dhe një milion më shumë gjatë vitit të ardhshëm. Kurse nafta e papërpunuar amerikane dhe prodhimi i gazit të lëngshëm do të arrijë në 20 milionë fuçi në ditë në vitin 2024.