Produkte mes mykut, pa etiketë dhe të paliçensuara, AKU bllokon 3 biznese në Jug

Autoriteti Kombëtar i Ushqimit ka bllokuar 3 subjekte, pasi ushtronin aktivitet pa licencë dhe jashtë kushteve të përshtatshme higjieno-sanitare.

AKU ka gjobitur me 3.85 milionë lekë tre biznese në jug, konkretisht: furrë buke, Market dhe Fast Food.

Postimi i plotë i AKU:

AKU KONTROLLE RIGOROZE NË JUG TË VENDIT, NDËRPRET AKTIVITETIN E 3 SUBJEKTEVE, BLLOKON DHJETRA KG PRODUKTE TË PASIGURTA PËR KONSUM DHE NDËSHKON ME 3.85 MILION LEKË KUNDRAVAJTJET LIGJORE NË FURRË BUKE, MARKET E FAST FOOD.

Task Forca e ngritur pranë Drejtorisë së Përgjithshme të Autoritetit Kombëtar të Ushqimit në bashkëpunim me Drejtorinë Rajonale të AKU Vlorë kanë kryer një sërë kontrollesh për të garantuar sigurinë ushqimore dhe për të siguruar vijimin e mbarëvajtjes së sezonit turistik veror.
Nga kontrollet e kryera në këto subjekte u konstatua: ushtrim aktiviteti i palicencuar, kushte të papërshtatshme higjeno-sanitare, mangësi në dokumentacion (gjurmueshmëri, plani HAÇP, raport analiza), si dhe etiketim i parregullt i produkteve.

Për shkeljet e konstatuara, AKU mori masat administrative si në vijim: 10 masa administrative “Gjobë” me vlerën totale 3,850,000 lekë, “Bllokim i produkteve” të pasigurta për konsum human, si dhe “Ndërprerje e menjëhershme e aktivitetit” për 3 subjektet.