Flash News
Grupi parlamentar i PD dorëzon në Kuvend propozimin: Pensioni të rritet në 300 euro
Vendimi për çështjen e vulës, Bardhi: Gjykata e Lartë t’i japë fund absurdit, PD i përket anëtarëve të saj
Nasip Naço del nga SPAK: U pyeta për çështjen ÇEZ-DIA, kam folur me letra, jo me heshtje
Shtyhet sërish seanca për Berishën, shkak mungesa e prokurorëve
Investimi në Sazan/ Rama pyetet pse nuk shpall tender kombëtar: Do shqyrtojmë aplikimin
Shqipëria po kalon orë të vështira dhe bash ajo që duket si theqafja e madhe, një përplasje ose konfrontim civil me pasoja të papërballueshme, për një vend që mezi rri në këmbë kështu si është, 29 vjet pas ardhjes së lirisë, pikërisht ajo rruga e qoftëlargut, duket se po ndiqet me besnikërinë më të madhe.
Në këtë situatë të rëndë ku kriza, teksa duket se ka kaluar majën, ditën tjetër njeh një kulm të ri, ka shumë zëra që janë bërë pjesë e debatit publik. Zëra kurajozë duhet thënë, se nuk është dita më e mirë për lirinë, që kanë dalë në ekrane e në forume, dhe kanë denoncuar atë që e quajnë regjim të Edi Ramës.
Në mes të kritikëve bie në sy një artikulim i veçantë, siç është ai i zotit Besnik Mustafaj.
Pjesa më e madhe e analistëve e pranojnë se Rama duhet të largohet, por kur vjen puna te zgjidhja, te dalja nga kriza, te një marrëveshje e mundshme, askush nuk ndalet në veçanti dhe nuk ka një ide shumë racionale. Koha është e emocioneve të forta. Ata që janë kundër Ramës, thonë se kryeministri duhet larguar siç largohet një regjim. Natyrisht, ka emra, publicistë dhe njerëz publikë që janë në krahun e shefit të mazhorancës, dhe mbajnë qëndrimin e tyre se Rama duhet të largohet me zgjedhje, se opozita kërkon pushtet në tavolinë, e kështu me radhë.
Besnik Mustafaj ndoshta është i vetmi që prej fillimit kërkon në daljet e tij publike, platforma për daljen nga kriza.
Ai u shpreh dhe dje se të dy palët, duhet të shpallin platformat e tyre, dhe me siguri, aty do të gjendet ndonjë pikë e përbashkët nga ku mund të nisë dialogu.
Kur Partia Demokratike dhe Lulzim Basha shpallën një dokument me 10 pika për sigurimin e zgjedhjeve të lira nga muaji Shkurt, Besnik Mustafaj i pranishëm në atë takim, tha se binte dakord me atë gjetje, por u shpreh se duhej sjellë në jetë një instrument që të kishte atë sharmin për të qenë i pranueshëm nga ndërkombëtarët dhe deri diku edhe nga qeveria.
Mustafaj ka thënë vazhdimisht se qeveria do të jetë njëra palë, për daljen nga kriza.
Ish-ministri i Jashtëm nuk e fsheh asnjëherë se ai është anëtar i Partisë Demokratike, votues i saj, dhe ka shprehur mbështetjen e vazhdueshme për aksionet e opozitës. Ai ka vlerësuar veçanërisht faktin se radhët e qëndresës nga protesta në protestë nuk janë tkurrur, dhe këtë e ka quajtur frymë. Po ashtu, ka pranuar se kreditet e Lulzim Bashës janë rritur ndjeshëm. Por ai pohon gjithnjë se vetë nuk është partizan i revolucionit, por i zgjidhjeve politike, i marrëveshjeve mes palëve.
Ndërkohë është i qartë dhe i vendosur në kritikat ndaj qeverisë dhe Edi Ramës. Ka deklaruar se kryeministri nuk e njeh historinë, ka harruar kur ai vetë nxirrte artifica dhe zgjedhjet janë shtyrë prej se e kërkonte ai në 2007. E ka denoncuar që ka marrë gjithë pushtetet. Ka folur për aferat e rënda korruptive me koncesionet, dhe dy ditë më parë, tha në një analizë se, për fat të keq, shteti i së drejtës ka rënë.
“Jemi në kushtet kur ka rënë shteti i së drejtës, mungojnë garancitë, mungojnë Gjykata e Lartë dhe Gjykata Kushtetuese”, u shpreh Mustafaj.
Shkrimtari është kundër mbajtjes së votimeve më 30 qershor. Ai tregoi se është aktiv këto ditë në takimet informale që ka me diplomatë dhe përfaqësues të vendeve të BE në Tiranë. Madje, u ka bërë edhe një pyetje të drejtpërdrejtë:
“Çështja që kam ngritur me ta, është se nëse shkohet kështu në zgjedhjet vendore, si do të jenë deklaratat e vendeve të tyre: Që ishin zgjedhje të lira e të ndershme?!”
Ai ka një pikëpamje të veçantë edhe për përmasën tjetër që ka marrë tashmë kriza, ku ka një përplasje të fortë mes qeverisë, Ramës dhe Presidentit. Sipas tij, ky debat i intereson kryeministrit pasi largon vëmendjen nga thelbi i krizës. Thelbi, thotë Mustafaj, janë pakënaqësia e madhe ndaj qeverisë dhe kryesorja, çështja e votës së lirë.
Në kushtet kur palët po shkojnë në skaje dhe fundi nuk ngjan se do të jetë i lumtur, kur nuk ka një ndërhyrje të dukshme dhe energjike europiane, fjalët dhe idetë e Mustafajt mund të ishin një nisje e mirë drejt daljes nga kriza, drejt një marrëveshjeje.
Ndoshta dy platformat siç kërkon ai, mund të takohen diku. Ai mund të ishte një moment armëpushimi, dhe më tej tonet mund të ulen dhe palët mund të gjejnë dakordësi të tjera.
Besnik Mustafaj, edhe pse me detyra të larta politike, si ministër i Jashtëm në qeverinë Berisha, apo deputet edhe anëtar kryesie i PD, ka ditur të ruajë profilin e tij dhe u qëndron të vërtetave që mendon, edhe kur ato nuk u pëlqejnë demokratëve, apo liderëve. Ndaj ai është i besueshëm dhe bindës në analizën që bën. Dhe padyshim, është dikush që të dy palët ia vlen t’ia dëgjojnë zërin, dhe pse jo, t’i ngarkojnë edhe më shumë përgjegjësi në këto orë të errëta, nëse vërtet kanë vullnetin për të dalë nga kriza, e për të gjetur një zgjidhje.
*Gazeta MAPO