Propozimi për bashkimin Shqipëri-Kosovë, Shaban Murati: S’mund të përdoret si kërcënim ndaj BE-së

Ish-diplomati shqiptar, Shaban Murati e konsideron ‘folklor diplomatik’ propozimin e bërë nga presidenti Hashim Thaçi për bashkimin sa më shpejt të Kosovës dhe Shqipërisë në një shtet. Në një koment të publikuar në gazetën ‘Dita’, Murati thotë se ideja e bashkimit është e drejtë, por ajo po vjen në një kohë të gabuar.

Murati thekson se dy shtetet shqiptare duhet të tregohen të kujdesshme për këtë çështje për shkak të efekteve diplomatike që ku mund të ketë ky propozim në rrethanat konkrete aktuale, ku po zhvillohen marrëdhëniet rajonale dhe ndërkombëtare të Kosovës.

Ish-diplomati i Shqipërisë kërkon edhe më shumë përmbajtje kur bëhet fjalë për përdorimin e bashkimit Kosovë-Shqipëri si një mjet presioni ndaj Bashkimit Evropian.

“Akoma më të përmbajtur duhet të tregohen edhe në përdorimin e çështjes së bashkimit të Shqipërisë dhe Kosovës si një instrument presioni diplomatik ndaj Bashkimit Europian, gjë që është një taktikë e palogjikshme shqiptare në të dy kryeqytetet tona, që një dreq e di se kush i ka këshilluar të përdorin udhëheqjet në Tiranë dhe në Prishtinë si kërcënim absurd ndaj BE-së, sikur kombi shqiptar do ta bëjë bashkimin për inat të BE dhe aq më keq ta paraqesësh bashkimin si goditje ndaj BE-së.

Bashkimi i Shqipërisë dhe Kosovës është një e drejtë historike dhe natyrale ekskluzive e popullit dhe e kombit shqiptar, që i njëson historia, gjuha, raca, gjaku, mentaliteti, origjina, traditat, etj. Por ai është një proces, që nuk ndodh në një vakum, por kërkon kushtet, rrethanat dhe faktorët e duhur, që e pranojnë dhe e jetësojnë atë. Bashkimi i Shqipërisë dhe Kosovës nuk është çështje vetëm e dëshirës së shqiptarëve, por është produkt i një kompleksi faktorësh e aktorësh, ku ndërthuren faktori euroatlantik, faktorët shqiptarë në të dy shtetet shqiptare dhe faktori rajonal”, shkruan Murati.

Edhe propozimin e Thaçit për një qëndrim të dy Parlamenteve për bashkimin, Murati thotë se ka ardhur në kohën më të papërshtatëshm. Sipas Muratit, kjo lëvizje dobëson kartën e presionit të Gjermanisë dhe Francës ndaj Serbisë për të njohur Republikën e Kosovës.

“Në kohen që Berlini dhe Parisi po ushtrojnë presion të fortë mbi Serbinë dhe mbi disa shtete të tjera europiane, që të njohin shtetin e Kosovës, nga Prishtina zyrtare del propozimi i jashtëkohshëm për të vënë në lëvizje parlamentet e dy shteteve shqiptare që të krijojnë një shtet të përbashkët. Kjo do të thotë që të dobësosh kartën e presionit gjerman dhe francez për njohjen e Kosovës, sepse lind opinioni që nuk ia vlen të njohesh një shtet, që mendon të bashkohet nesër me një shtet tjetër.

Një propozim apo ide e tillë ia lehtëson shumë punën dhe terrenin diplomacisë dhe shtetit serb, i cili siç deklaroi presidenti Vuçiç pas samitit të Berlinit e ndjeu veten të izoluar, sepse të gjithë pjesëmarrësit ishin për njohjen e Kosovës. Tani vjen nga qielli argumenti që nuk ka nevojë të njihet një shtet, që planifikon të bashkohet së shpejti me shtetin tjetër të njohur shqiptar. Kështu diplomacia serbe bëhet më e fortë që të lobojë të mos njihet Kosova”, shkruan diplomati.

Shkrimin e tij, Shaban Murati e mbyll në këtë mënyrë: “Shihet se efektet negative të një propozimi të tillë janë të shumta në planin diplomatik. Mund ta quajmë edhe foklor diplomatik, me destinacion të brendshëm, por me dëm për diplomacinë, politikën e jashtme dhe interesat e shtetit të pavarur të Kosovës dhe të faktorit shqiptar në rajon.”

Ishte presidenti kosovar, Hashim Thaçi që deklaroi pak ditë më parë se bashkimi i dy shteteve shqiptare duhet të ndodhë edhe për shkak se Europa po i mbyll dyert Kosovës dhe Shqipërisë.