Kryeministri Edi Rama ka folur për shumë çështje brenda dhe jashtë Shqipërisë në Këshillin e Atlantikut, mes tyre edhe nismën më të re të qeverisë, aktin normativ anti-KÇK si dhe për reagimin e PS ndaj personave të denoncuar dhe të hetuar si të inkriminuar pas përfshirjes së tyre në politikë.
“Së fundmi, në Shqipëri është miratuar një akt normativ për të luftuar korrupsionin dhe krimin, sapo ka nisur të zbatohet dhe është përgëzuar. Keni 6 vjet në qeveri dhe kjo çështje është e rëndësishme , keni përgjegjësi se përse nuk është bërë më parë dhe për të vijuar, keni vepruar në kuadër të këtij akti kundër krimit e korrupsionit, në të shkuar me njerëz të partisë suaj të përfolur të inkriminuar, keni reaguar ngadalë apo s’ keni reaguar aspak?”, e pyet Ramën gazetarja e Zërit të Amerikës, ndërsa kryeministri fillimisht e sqaron pse nisma nuk erdhi më herët.
“Si mund të bëhej kjo më parë pa patur SPAK nga reforma në drejtësi dhe vettingu, të ndiqnim pasuritë e krimit, të sekuestronim pasuritë e mbledhura nga aktivitete e paligjshme me gjykatat që kishim gjatë këtyre viteve dhe që ende kemi gjyqtarë dhe prokurorë që janë pjesë e krimit të organizuar. Kështu na u desh të prisnim me durim të punonim në një terren ku policia nuk do poshtërohej kur i referonte çështje prokurorisë dhe gjykatës. Tani kemi SPAK e ngritur për këtë qëllim dhe kemi edhe gjykatën e posaçme. Këto çështje do gjykohen nga ata që kanë kaluar vettingun.
Me ndihmën e miqve të SHBA hartuam dekriminalizimin, ka një kontroll të imtësishëm të historisë së jetës dhe nëse kanë dënim nuk mund të zgjidhen. Ne jemi në vijim të vettingut, ata që nuk justifikojnë pasuritë janë jashtë sistemit dhe do paditen në të ardhmen. Ata që janë dënuar duhet të vërtetojnë pasuritë e tyre, që vijnë nga puna. Ka një regjistër të personave të dënuar, nuk mund të jetë selektive. E njëjta për personat që nuk janë dënuar prej sistemit të korruptuar drejtësisë”, tha kryeministri, duke u ndalur edhe te reagimi që ka patur PS me të vetët e denoncuar si të inkriminuar.
“Pse jo me politikanët? Është e thjeshtë, është sistemi i drejtësisë, kjo eshte arsyeja pse po reformojmë drejtësinë, do kërkojë kohë, por nuk jemi në 1945 që të ndjek pas politikanët. Ne kemi një inspektorat, ka persona që janë në hetim e sipër por nuk janë në këtë listë, nuk po flasim për dyshime, por për persona të dënuar e të paditur.
Partia nuk është një vend ku behen hetime e gjyqe, ku zgjedh se kush do marrë pjesë. Partia asnjëherë nuk gjykohet nga keqbërja e disa individëve, por nga mënyra si reagon. Nëse partia bëhet avokate në mbrojtje e për të shfajësuar para publikut njerëz që kanë lidhje jo të mira, atëherë kjo përbën problem. Por nuk me thua një rast kur ne nuk jemi distancuar kur drejtësisë ka bërë punën e vet, jemi e vetmja parti që e kemi bërë këtë”, shprehet Rama.
Kujtojmë se më herët janë denoncuar si të lidhur me krimin apo trafikun e drogës zyrtarë të lartë të PS si ish kreu i Bashkisë së Durrësit, Vangjush Dako, i shpallur ‘non grata’ nga SHBA, i cili u shfaq pak ditë pas tërmetit të 26 nëntorit krah kryeministrit Rama, apo ish ministri i Brendshëm Saimir Tahiri i cili u dënua me 3.4 vjet shërbim prove prej gjykimit të shkurtuar për ‘shpërdorim detyre’, pas akuzave për trafik droge dhe grup të strukturuar kriminal me ‘Habilajt’, apo rasti i ish kryebashkiakut të Vorës, Agim Kajmaku, aktualisht në arrati, Valdrin Pjetri në Shkodër etj.
Financuar Nga Bashkimi Europian
