Flash News

Foto/ Sherr në një qendër numërimi në Kukës, policia tenton të ndalojë të riu

PD kryeson në Njësinë 2 në Tiranë

Numërohen 5 kuti në qarkun e Gjirokastrës, ja si ndahen votat

Hapen 6 kutitë e para për numërim në Kukës

Dalin shifrat nga KQZ: 42.16% e shqiptarëve brenda vendit votuan në zgjedhjet parlamentare

Rajoni

“Ballkani i Hapur” kthehet në ‘mollë sherri’ për Kosovën dhe Malin e Zi

Politiko 31 Maj 2022, 10:51

“Ballkani i Hapur” kthehet në ‘mollë sherri’

“Ballkani i Hapur”, nisma e Shqipërisë, Serbisë dhe Maqedonisë së Veriut, është kthyer në debat për Kosovën dhe Malin e Zi. Presidentja e Kosovës Vjosa Osmani dhe kryeministri i Malit të Zi Dritan Abazoviç kanë shkëmbyer replika teksa folën për “Ballkanin e Hapur”.

Abazoviç, i cili konfirmoi pjesëmarrjen në takimin e nismës në Ohër, tha nga Samiti i Demokracisë në Evropën Juglindore, se një pjesë e shoqërisë në Mal të Zi e kundërshton nismën, për shkak se pjesë e saj është Serbia, pra për një problem personal.

“Për mendimin tim, një pjesë e shoqërisë në Mal të Zi e kundërshton ‘Ballkanin e Hapur’, vetëm sepse është kundër çdo gjëje që është Serbia. Ata nuk e kanë problem nismën, por kanë problem personal. Unë nuk po angazhohem për ‘Ballkanin e Hapur’ ose për Procesin e Berlinit apo ndonjë nismë tjetër. Unë po angazhohem për bashkëpunimin rajonal. Çdo nismë që ka për qëllim bashkëpunimin rajonal, gjithçka që mund të shfrytëzojmë për bashkëpunim, është sukses”, tha Abazoviç.

Deklaratës së Abazoviç iu përgjigj presidentja Osmani. Ajo i tha kryeministrit të Malit të Zi se duhet bërë diferenca mes një lideri demokrat dhe një ish-ministri propagande, teksa iu referua presidentit serb Aleksandër Vuciç.

“Se a është dikush lider i zgjedhur në mënyrë demokratike, që beson në vlerat e sundimit të ligjit, të drejtat e njeriut dhe në demokracinë dhe a është dikush ish-ministër i propagandës së regjimit të Milosheviçit, kjo duhet të ketë rëndësi. Në të kundërtën, porosia që po dërgojmë është se nuk ka rëndësi nëse je Zelensky apo Putin”, theksoi Osmani.

Abazoviç, teksa iu kundërpërgjigj Osmanit, tha se Ohri (vendtakimi i nismës) nuk mund të përbëjë problem, kur në Procesin e Berlinit do të ulen me të njëjtat fytyra në tryezë.

“Si ka mundësi që ju, me shumë gjasa do të uleni në Procesin e Berlinit me të njëjtët njerëz, të cilët fatkeqësisht nuk e njohin Kosovën, ndërkaq Ohri është problem? Kjo është ajo që unë nuk e kuptoj”, tha Abazoviç.

Prishtina zyrtare kundërshton nismën “Ballkani i Hapur”, duke këmbëngulur në atë që Kosova duhet të përfaqësohet si e barabartë, gjegjësisht, si shtet i pavarur brenda cilitdo proces, përfshirë edhe nismën “Ballkani i Hapur”.

Nisma “Ballkani i Hapur” është vazhdimësi e “mini-Shengenit” të prezantuar në Novi Sad të Serbisë më 10 tetor të vitit 2019, nga liderët e Serbisë, Maqedonisë së Veriut dhe Shqipërisë. Kur u prezantua nisma e “Ballkanit të Hapur”, asokohe Mali i Zi me Qeverinë e Partisë Demokratike të Socialistëve (DPS), nuk pranoi të merrte pjesë.

Kryeministri shqiptar i Malit të Zi, Dritan Abazoviç, shprehu se e mbështet konceptin e nismë dhe çdo nismë tjetër që sjell bashkëpunim rajonal. Ndërsa Bosnjë-Hercegovina dhe Kosova e kanë kundërshtuar “Ballkanin e Hapur”.

Të fundit