Ish-diplomati shqiptar, Shaban Murati ka kritikuar zyrtarët e Tiranës dhe Prishtinës të cilët nxituan të duartrokisnin presidentin serb, Aleksandar Vuçiç, pas kërkesës së tij për dialog të brendshëm për çështjen e Kosovës.
Ndonëse Murati nuk e përmend me emër në artikullin e publikuar në ‘Gazetën Shqiptare’, kritika dukshëm i drejtohet kryeministrit Edi Rama, i cili e reklamoi me të madhe deklaratën e Vuçiç për ketë çështje.
“Në diplomaci nuk është si në art ku mund ta duartrokasësh artistin sapo del në skenë dhe ende pa nisur të këndojë, me qëllim që ta inkurajosh”, e nis shkrimin e tij Murati duke shtuar se në Beograd do të keqkuptohen këto duartrokitje që disa grupe politike dhe mediatike në Tiranë dhe në Prishtinë i drejtuan presidentit të Serbisë.
Diplomati shqiptar thekson se duartrokitjet e Shqipërisë dhe Kosovës për Vuçicin mund të shtyjnë Brukselin të kërkojë nga Prishtina lëshim për hir të “reciprocitetit”, ndërsa ‘dialogu i brendshëm në Serbi’ mund të zgjasë për vite të tëra. Ai kërkon nga zyrtarët shqiptarë më shumë durim në këtë çështje.
“T’i japësh duartrokitje shqiptare atij (Vuçiçit), do të thotë të pranosh vartësinë e fatit të Kosovës nga Serbia, gjë që është e papranueshme, sepse fatin e Kosovës e ka përcaktuar populli i Kosovës, e ka përcaktuar NATO dhe faktori perëndimor, që e çliroi dhe e bëri shtet, dhe njohja nga 114 shtete anëtare të OKB. Dialogët, debatet apo panelet politiko-propagandistike serbe janë çështje e brendshme serbe dhe nuk kanë logjikë emocionet e disa zyrave shtetërore shqiptare në të dy anët e kufirit për dialogun serb. Kosovës dhe Shqipërisë u intereson që Serbia të njohë shtetin e Kosovës dhe nëse presidenti Vuçiç do të vendosë ta bëjë atë hap, ahere mendoj se ka vend për duartrokitje”, shkruan Murati.
Shaban Murati tregon se ka dyshime të forta për këtë nismë të Vuçiçit kur shkruan se: “Presidenti i Serbisë nuk është shumë bindës, sepse edhe në artikullin e tij të reklamuar ai vazhdon të përdorë termin kolonialist serb “Kosova dhe Metohija”. Nuk krijon bindje ai, sepse jo shumë larg, por dhjetë ditë përpara artikullit, në takimin e tij me kryeministrin e Greqisë, Aleksis Cipras, Vuçiç lavdëroi dhe falënderoi Greqinë pse nuk njeh Kosovën… Edhe fakti që presidenti serb vendosi të bëjë thirrjen për dialog të brendshëm në një artikull gazete, dhe jo në presidencë, as në parlament dhe as në ndonjë institucion zyrtar, tregon se atij i intereson më shumë aspekti propagandistik i hapit të tij… Presidenti serb kërkon të fitojë kohë dhe në këtë funksion hodhi idenë e dialogut të brendshëm serb për Kosovën. Me këtë synon t’i thotë Brukselit se ai e ka jashtëzakonisht të vështirë ta marrë shpatën dhe “ta presë nyjën gordiane” dhe me këtë taktikë të nxisë Brukselin t’i japë si kompensim ndonjë lëshim të madh nga Prishtina.”
Diplomati Murati kërkon nga zyrtarët shqiptarë që vlerësuan nismën e presidentit serb, një prej tyre ishte edhe Edi Rama, që tani të qëndrojnë në heshtje dhe të presin që Vuçiç të “këndojë këngën e njohjes së Kosovës”.
“Koha ka kaluar që Serbia të njohë Kosovën si shtet i pavarur. 18 vjet pas çlirimit të Kosovës nga NATO kanë qenë më se të mjaftueshëm për dialogë e stërdialogë. Tani që presidenti i Serbisë dhe Serbia janë vënë me shpatulla pas murit nga BE, këtë pozicion të vështirë duan ta shesin sa më shtrenjtë. Beogradi ka të drejtën ta shesë, por as Tirana dhe as Prishtina nuk kanë asnjë arsye të blejnë ajër diplomatik. Të dashur shqiptarë, prisni njëherë të këndojë presidenti serb këngën e njohjes së Kosovës, pastaj duartrokisni. Tani duhet të rrini në heshtje”, mbyll artikullin e tij Murati.
Financuar Nga Bashkimi Europian
