Dhjetë sfidat që Spanja duhet të fitojë për të eliminuar Francën dhe Mbappén

Spanja është vetëm një fitore larg finales së Kupës së Botës 2026, por për ta arritur atë duhet të kalojë pengesën më të vështirë të turneut: Francën. Skuadra e Didier Deschamps ka qenë ndër më bindëset e Botërorit, duke mbetur e pamposhtur dhe duke shfaqur një sulm që ka prodhuar më shumë gola se çdo ekip tjetër.

Sipas një analize të Marca, "La Roja" duhet të kalojë dhjetë prova vendimtare për të eliminuar francezët dhe për të siguruar një vend në finalen e madhe.

Sfida e parë do të jetë shfrytëzimi i hapësirave në krahët e mbrojtjes franceze. Lamine Yamal dhe Nico Williams pritet të kenë një rol kyç për të vënë në vështirësi Jules Koundé dhe Lucas Digne, edhe pse mbrojtësi i Barcelonës ka paralajmëruar se rreziku i Spanjës nuk vjen vetëm nga Yamal.

Një tjetër element vendimtar do të jetë kontrolli i topit. Me lojtarë si Pedri, Rodri, Dani Olmo dhe Fabián Ruiz, Spanja synon të diktojë ritmin e lojës dhe ta mbajë Francën larg zonës së saj. Iberikët janë skuadra me posedimin më të lartë në këtë Botëror dhe ndër ekipet që rikuperojnë topin më shpejt pas humbjes.

Megjithatë, dominimi i lojës nuk duhet të shoqërohet me humbje të ekuilibrit. Çdo gabim mund të ndëshkohet menjëherë nga shpejtësia e Mbappés, Dembélés, Olises apo Doués, të cilët janë ndër lojtarët më të rrezikshëm në kundërsulm.

Edhe mbrojtja franceze përbën një sfidë më vete. Dyshja Saliba-Upamecano ka qenë ndër më të fortat e turneut, ndërsa presioni që francezët ushtrojnë sapo humbin topin ua vështirëson ndjeshëm jetën kundërshtarëve.

Në repartin ofensiv, përveç Mbappés, vëmendje e veçantë duhet t'i kushtohet Michael Olise. Mesfushori i Bayern Munich ka qenë organizatori kryesor i sulmeve të Francës dhe asistuesi më i mirë i turneut, duke u krahasuar nga Thierry Henry me legjendën e NFL-së, Tom Brady, për saktësinë e pasimeve.

Po aq i rrezikshëm është edhe Ousmane Dembélé. Fituesi aktual i "Topit të Artë" po zhvillon një Botëror të shkëlqyer, me pesë gola dhe një ndikim të vazhdueshëm në lojën sulmuese të Francës.

Statistikat flasin në favor të "Les Bleus". Me 16 gola të shënuar dhe mesatarisht më shumë se 2.5 gola për ndeshje, Franca ka sulmin më efikas të turneut dhe ka treguar se i mjaftojnë pak raste për të ndëshkuar kundërshtarët.

Një tjetër armë e skuadrës së Deschamps është aftësia për të goditur në momentet kur ndeshja duket e ekuilibruar. Një rikuperim topi, një kundërsulm i shpejtë apo një moment individual mund të ndryshojnë fatin e sfidës brenda pak sekondash.

Shpejtësia mbetet një nga pikat më të forta të Francës. Mbappé ka regjistruar sprintin më të shpejtë të Botërorit, ndërsa Dembélé, Doué, Olise dhe Koné e bëjnë çdo tranzicion ofensiv tepër të rrezikshëm. Nëse Spanja vendos të mbajë mbrojtjen lart, Laporte dhe Cubarsí do të duhet të jenë perfektë në mbulimin e hapësirave.

Në fund, gjithçka rikthehet te emri më i madh i Francës. Kylian Mbappé, bashkë me Lionel Messin, kryeson listën e golashënuesve të turneut dhe mbetet lojtari që mund ta vendosë një ndeshje me një aksion të vetëm.

Spanja mund të dominojë posedimin dhe të kontrollojë mesfushën, por nëse dëshiron biletën për në finalen e Kupës së Botës, do t'i duhet të gjejë mënyrën për të neutralizuar njeriun më të rrezikshëm të këtij Botërori: Kylian Mbappén.