4 milionë euro për Ye, media e huaj: Qeveria në shënjestër të polemikave për financimin

Artisti Ye, i njohur më parë si Kanye West, mbajti në Tiranë një nga koncertet më të mëdha të zhvilluara ndonjëherë në Shqipëri, por përtej spektaklit muzikor, ngjarja u shoqërua me debate për mbështetjen financiare të qeverisë shqiptare.

Sipas medias së huaj IQ Live Music Intelligence, koncerti i 11 korrikut tërhoqi rreth 60 mijë persona në një stadium të përkohshëm të ndërtuar posaçërisht për këtë aktivitet. Projekti u mbështet nga autoritetet shqiptare si pjesë e strategjisë për promovimin e turizmit dhe imazhit të vendit në arenën ndërkombëtare.

Për organizimin e koncertit u ndërtua Eagle Stadium, një impiant i përkohshëm me kapacitet rreth trefish më të madh se Arena Kombëtare. Sipas raportimeve të përmendura nga IQ Live Music Intelligence, ndërtimi i këtij stadiumi mund të ketë kushtuar mbi 50 milionë euro.

Në qendër të vëmendjes së medias ndërkombëtare është bërë edhe vendimi i qeverisë shqiptare për të akorduar rreth 400 milionë lekë (afërsisht 4 milionë euro) nga fondi rezervë i shtetit për garantimin e zhvillimit të koncertit.

Kryeministri Edi Rama e ka mbrojtur këtë vendim, duke argumentuar se një koncert i tillë nuk është vetëm një aktivitet artistik, por edhe një mundësi për marketing ndërkombëtar dhe zhvillim ekonomik.

“Një koncert i kësaj përmase dhe me një artist të këtij niveli nuk është thjesht një ngjarje artistike. Është marketing global për Shqipërinë”, ka deklaruar Rama, duke shtuar se aktiviteti pritej të sillte mbi 100 milionë euro ndikim ekonomik për vendin.

Sipas kryeministrit, një pjesë e konsiderueshme e spektatorëve ishin turistë të huaj. Nga rreth 60 mijë pjesëmarrës, mbi 40% thuhet se ishin fansa ndërkombëtarë që udhëtuan drejt Shqipërisë për koncertin, një nga pak ndalesat europiane të Ye këtë vit.

Megjithatë, financimi publik i aktivitetit ka shkaktuar kritika, veçanërisht për shkak se koncerti u zhvillua në një periudhë kur në Tiranë vijojnë protesta kundër qeverisë prej më shumë se një muaji. Kritikët e kanë konsideruar investimin si një përdorim të diskutueshëm të fondeve publike dhe si një mënyrë për të zhvendosur vëmendjen nga çështjet politike që kanë nxitur protestat.

Protestat nisën fillimisht kundër një projekti për ndërtimin e një resorti luksoz në bregdet dhe më pas u zgjeruan duke përfshirë shqetësime për zhvillimet në zonat e mbrojtura, ndërtimet në vijën bregdetare dhe pretendime për korrupsion.

Pas koncertit, Ye falënderoi publikisht Shqipërinë dhe kryeministrin Rama për mikpritjen, duke shkruar: “Faleminderit Edi Rama dhe gjithë Shqipërisë që ndërtuat një stadium dhe më mirëpritët në vendin tuaj të mrekullueshëm.”

IQ Live Music Intelligence kujton gjithashtu se koncerti në Tiranë ishte një nga performancat e pakta të Ye këtë vit, pasi disa shfaqje të planifikuara në vende të tjera europiane u anuluan pas kundërshtimeve nga autoritetet lokale.

Media ndërkombëtare përmend edhe polemikat që kanë shoqëruar artistin vitet e fundit për deklarata të konsideruara antisemite, raciste dhe pro-naziste, për të cilat Ye ka kërkuar falje dhe ka deklaruar se lidhen me problemet e tij të shëndetit mendor.