Amnesty International: Kampet në Shqipëri, pasqyrë e një sistemi çnjerëzor

Vetëvrasja e marokenit 42-vjeçar Hamid Badoui në një burg të Torinos ka ngjallur reagime të ashpra dhe debate të gjera në Itali, ku opozita dhe organizatat për të drejtat e njeriut kanë shënjestruar qeverinë italiane për trajtimin çnjerëzor të emigrantëve në kampin e Gjadrit, në Shqipëri.

Badoui kishte qëndruar rreth një muaj në kampin e Gjadrit, ku ishte transferuar në kuadër të marrëveshjes së migracionit mes Italisë dhe Shqipërisë. Para se të ndërronte jetë, ai i kishte shprehur avokatit të tij frikën se do ta rikthenin në Shqipëri, duke deklaruar: “Më mirë në burg sesa në Shëngjin.”

Kritika të ashpra ndaj qeverisë Meloni

Opozita italiane ka reaguar me tone të forta, duke akuzuar qeverinë e kryeministres Giorgia Meloni për krijimin e një sistemi që shkel të drejtat e njeriut dhe trajton emigrantët në mënyrë degraduese. Edhe Amnesty International Italia ka reaguar përmes një deklarate zyrtare, ku dënon “Modelin Meloni”, duke e quajtur atë “një burim vuajtjesh dhe vdekjesh.”

Deklarata e Amnesty nënvizon se kampet si ai në Gjadër përbëjnë struktura ekstraterritoriale me izolim të thellë gjeografik, ku emigrantët përballen me kufizime të mëdha në aksesin ligjor dhe shëndetësor, si dhe ndalim administrativ të përdorur në mënyrë ndëshkuese, në kundërshtim me normat ndërkombëtare.

“Kushte degraduese dhe mungesë e kujdesit human”

Sipas organizatës, si në Qendrat e Kujdesit Shëndetësor në Itali (CPR), ashtu edhe në qendrat e reja në Shqipëri, njerëzit jetojnë në kushte degraduese, pa kujdes të mjaftueshëm shëndetësor dhe në një atmosferë të vazhdueshme braktisjeje dhe mungese informacioni. Protestat, vetëlëndimet dhe vetëvrasjet – si ajo e Badoui – për Amnesty janë simptomat e një sistemi që synon izolimin dhe ndëshkimin.

“Vdekja e Hamid Badoui është pasojë e drejtpërdrejtë e një politike që përdor frikën dhe represionin për të (mos)menaxhuar lëvizshmërinë njerëzore,” theksohet në deklaratë. Po ashtu, Amnesty kritikon votëbesimin e djeshëm në Senatin italian, që e shndërroi në ligj dekretin e ri për emigrantët, duke e cilësuar si një veprim që zyrtarizon një qasje propagandistike dhe në kundërshtim me të drejtat themelore të njeriut.

Kërkesa për hetim dhe ndërprerje të transfertave drejt Shqipërisë

Amnesty International Italia bën thirrje për ndërprerjen e menjëhershme të transfertave drejt Shqipërisë, si dhe për një hetim të pavarur mbi përgjegjësitë institucionale që lidhen me vdekjen e Badoui dhe shkeljet sistemike në qendrat e ndalimit administrativ.

Në deklaratë kërkohet gjithashtu hapja e një debati publik mbi dështimin e masave të ndalimit administrativ dhe promovimi i modeleve alternative, të bazuara në pritje, drejtësi dhe respekt për dinjitetin njerëzor.

“Sa herë që një njeri i jep fund jetës për të shmangur pjesëmarrjen në këtë sistem, kemi të bëjmë me një dështim rrënjësor të politikave publike për migrantët. Mbështetja e mëtejshme e ‘modelit shqiptar’ është bashkëfajësi në një regjim që prodhon përjashtim, vuajtje dhe vdekje,” përfundon deklarata.