‘Hajduti 2 metra’, qiriu në tortën e kryeministrit Rama

Struktura e Posaçme Kundër Krimit të Organizuar dhe Korrupsionit, SPAK, njoftoi sot se ka kërkuar dhe marrë miratimin e gjykatës për masë sigurie arrest me burg për ish-ministrin e shëndetësisë, Ilir Beqajn si dhe masa të tjera sigurie për bashkëpunëtorët e tij të dyshuar, ndërsa gjatë kontrolleve të kryera në zyra dhe biznese, u sekuestruan 47 mijë euro dhe 700 mijë lekë.

“Personi nën hetim I. B. në cilësinë e Drejtorit të Përgjithshëm të SASPAC-ut duke vepruar si urdhërues në bashkëpunim me personin nën hetim E. K., i emëruar nga vetë personi nën hetim I. B. në datën 26.05.2022 si koordinator i zyrës “Facility Point” për projektin EUSAIR, në SASPAC,  përgjatë viteve 2022-2023 dyshohet se kanë kryer procedura prokurimi fiktive në kundërshtim me rregullat,” thuhet në njoftimin e SPAK.

Ky arrestim vjen pikërisht sot, më 4 korrik, teksa kryeministri Edi Rama feston sot ditëlindjen e 60-të.

Beqja dhe Rama njihen si miq të afërt që në rininë e tyre të hershme,  kur luanin basketboll së bashku.

Arrestimi padyshim që do e këtë mërzitur kryeministrin i cili dikur e mbronte me gjithë zërin e tij.

Abuzimet me fondet e SASPAC

Përveç koncesionit të sterilizimit, Ilir Beqaj është nën hetim pasuror nga SPAK lidhur me abuzimet me fondet e SASPAC (Agjencia Shtetërore të Programimit Strategjik dhe Koordinimit të Ndihmës), e cila drejtohej nga Beqja deri në momentin që ky i fundit u detyrua të japë dorëheqje pasi GJKKO caktoi dy masa sigurie ndaj tij: detyrim paraqitje dhe ndalim të udhëtimeve jashtë vendit.

Kujtojmë se prej datës 28 dhjetor 2023), me urdhër të SPAK, Byroja Kombëtare e Hetimit ka ushtruar kontrolle edhe në “Delta Pharma” dhe farmaci të tjera kryesisht në Tiranë.

Kontrollet kanë ardhur pasi ndaj Beqajt po zhvillohet një hetim i ri për për lidhjet që ish-ministri ka pasur ose ka me këto kompani, dhe mënyrën sesi janë lidhur kontrata kur ky i fundit ka qenë në krye të Ministrisë së Shëndetësisë.

Po ashtu mësohet se gjatë periudhës kur mori këtë detyrë, Beqaj ka miratuar një ligj që favorizonte kompanitë farmaceutike.

Hetimet për këto kompani kanë nisur pas indicieve që SPAK ka marrë lidhur me shkeljet e pretenduara, kur ky institucion drejtohej nga Beqaj. Theksohet se ky është një hetim i ri, i cili nuk lidhet me hetimet e mëparshme për Ilir Beqajn.

Nga kontrollet e ushtruara në “Delta Pharma” dhe farmaci të tjera, janë sekuestruar dokumente që i shërbejnë hetimit, e po ashtu kompjuterë, bilancet, furnizime dhe telefona.

Ndërkohë, rezulton se gruaja e Beqajt, Adriana Beqaj, ka qenë aksionere në një kompani që lidhet me ‘Delta Pharma’.

Beqaj u emërua nga Rama në krye të SASPAC

Ish-ministri Shëndetësisë Ilir Beqaj u vu në pranga, i dyshuar për abuzim me fondet e BE-së gjatë kokës që drejtonte Agjencinë Shtetërore të Programimit Strategjik dhe Koordinimit të Ndihmës, SASPAC.

Masa e sigurisë ndaj Beqaj është marrë me kërkesë të SPAK, si pjesë e hetimeve për abuzime me fondet e BE-së gjatë periudhës që Beqaj mbante postin e drejtorit të SASPAC.

Beqaj ka qenë deputet i Partisë Socialiste për disa legjislatura dhe ishte ministër i Shëndetësisë nga viti 2013 deri në vitin 2017.

Në vitin 2021, ai u emërua në krye të SASPAC nga kryeministri Edi Rama, edhe pse ndaj tij po zhvilloheshin hetime për kontratat koncesionare në shëndetësi.

Pasi ish-ministri i Shëndetësisë u emërua në krye të Agjencisë që monitoron milionat e ndihmës nga Bashkimi Evropian, prokurorët dyshojnë se ai dhe vartësit e tij ngritën një skemë korrupsioni dhe pastrimi parash me fatura fiktive.

Si pjesë të hetimit, Byroja Kombëtare e Hetimit, BKH, ndërmori më 27 dhjetor një seri bastisjesh të banesave, bizneseve, automjeteve, si dhe kontrollin personal për tetë të dyshuar, përfshirë ish-ministrin Ilir Beqaj dhe shoferin e tij, Arben Dani.

Përveç hetimit për abuzimit me fondet e SASPAC, Ilir Beqaj është akuzë për shpërdorim detyrë për kontratën koncesionare për instrumentet kirurgjikale.

Kur Rama mbronte ‘hajdutin 2 metra’

Në konferencën e fundvitit të kaluar, kryeministri Edi Rama mori në mbrojtje mikun e tij, Ilir Beqaj, duke thënë se ai nuk ka abuzuar me fondet e BE-së.

I pyetur se çfarë mund të thotë tani për një hajdut dymetrosh, Rama tha se këtë e përcakton vendimi i gjykatës.

 “Se kush është hajdut, nuk e përcakton as ti as unë, e përcakton vendimi i formës së prerë të gjykatës.

Nuk dua të hyj fare në komente të rastit, por për aq sa unë jam i informuar, deri tani akuza është shpërdorim detyre, jo korrupsion.

Zhurma e bërë për ‘zhvatje’ fondesh të BE-së është një gënjeshtër sepse zyra nuk menaxhon fonde të BE-së. Nuk i kalojnë fonde as nga BE-ja dhe as nga ndonjë institucion tjetër apo palë tjetër në bazë të marrëveshjeve bilaterale.

Fakti që dikush është nën hetim nuk do të thotë asgjë. Por nuk do të thotë se cilido të turret me vrap dhe një njeri nën hetim ta bëjë kriminel,” tha Rama.

Arrestimi Ilir Beqajt, socialistët ‘kyçin’ gojën

Deputetët dhe ministrat socialistë të pyetur nga gazetarët në lidhje me arrestimin e ish ministrit Ilir Beqaj me urdhër të SPAK, kanë zgjedhur të hedhin duke u shprehur se kur flet drejtësia politikanët heshtin.

Toni Gogu: Jemi në Kuvend, ne bëjmë ligje. Komentet për arrestimet shkoni në organet ligjzbatuese.

Nasip Naço: Kur flet drejtësia, heshtin të tjerët.

Elisa Spiropali: Ç’ është ky ngut, ky zell, gjithë  kjo kënaqësi që keni për të vënë mikrofonat lidhur me një çështje  që do të sqarohet nga drejtësia, jo nga ne?!

Ulsi Manja: Nuk pyetjen politikanët për çështjet e drejtësisë.

Afera e Sterilizimit

Ndaj ish-ministrit ishte caktuar nga GJKKO masa e detyrimit të paraqitjes dhe ndalim dalje jashtë vendit pasi ai po hetohet për aferën e 'Sterilizimit'.

Hetimi bën fjalë për shkeljet e pretenduara nga SPAK, në koncesionin e sterilizimit me vlerë 100 milionë euro dhe afat 10-vjeçar, të fituar nga biznesmeni Ilir Rrapaj tashmë i arrestuar bashkë me ish-zv.ministrin e Shëndetësisë, Klodian Rrjepaj.

Koncesioni i sterilizimit kaloi në duart e prokurorëve të SPAK në korrik 2022, të cilët nisën hetimin për të zbardhur procedurat e dhënies me koncesion të këtij shërbimi.

Ajo është një prej katër projekteve të PPP ne mbështetje buxhetore në shëndetësi që e ka zanafillën në mandatin e parë qeverisës të kryeministrit Edi Rama. Kontrata u firmos në vitin 2015 mes ish-ministrit të Shëndetësisë, Ilir Beqja dhe kompanisë koncesionare SaniService –aksionerët e së cilës janë Investital LLC dhe kompanitë italiane “Servizi Italia”, “Tecnosanimed” dhe “U.Jet S.r.l”.

Paketën më të madhe të aksioneve në këtë koncesion e zotëron Investital LLC- një kompani e vogël e themeluar me kapital 1 mijë euro në Kosovë nga Ilir Rrapaj. Sipas të dhënave të publikuar nga BIRN rezulton se Rrapaj u kthye në Shqipëri pas zgjedhjeve të vitit 2013 dhe para se të fitonte koncesionin, vendosi kontakte të shpeshta me ish-ministrin e Shëndetësisë, Ilir Beqaj.

Elektrobisturia është pjesë e njërit prej seteve kirurgjikale, që kompania koncesionare “SaniService” i shet Ministrisë së Shëndetësisë për çmime që variojnë nga 16 mijë lekë deri në 45 mijë lekë (me TVSH) për çdo ndërhyrje.

Kontrata e Partneritetit Publik Privat për sterilizimin e instrumenteve kirurgjikale është në vitin e shtatë të operimit, dhe ka shënuar rritje të ndjeshme të kostove të parashikuara.

Anëtarët e komisionit që përgatiti studimin e fizibilitetit për koncesionin e sterilizimit i thanë Prokurorisë se qendra nuk ishte vënë në punë prej tetë vitesh për shkak të mungesës së stafit të trajnuar.

Ata e përdorën atë si një argument më shumë se pse shërbimi duhej dhënë me koncesion.

Si nisën hetimet nga SPAK për aferën

I pari që u mor në pyetje nga prokurorët ishte anëtari e Komisionit të Koncesionit, Saimir Kadiu, si dhe më pas anëtarët e Komisionit të Tenderit.

Procedura për sterilizimin e seteve kirurgjikale është dosja e parë e SPAK edhe ishte nën hetim prej 3 vitesh.

Kallëzimi u bë nga përfaqësues të Nismës Thurje, të cilët kanë denoncuar penalisht zyrtarët e përfshirë në dhënien me koncesion të procesit të sterilizimit.

Ata kanë kërkuar hetimin e zyrtarëve duke nisur nga ish-ministri i Shëndetësisë, Ilir Beqja, të cilët sipas tyre kanë abuzuar me buxhetin e shtetit.

E-maili drejt Rjepajt nxjerr "zbuluar" ish-ministrin Ilir Beqaj

Një e-mail i dërguar nga ish-ministri i Shëndetësisë, Ilir Beqja, tek ish-vartësi i tij, Klodian Rjepaj, pak ditë para lidhjes së kontratës koncesionare të sterilizimit, ka ekspozuar faktin se zyrtarët e ministrisë e dinin fituesin.

Ndonëse nuk ishte hartuar ende kontrata koncensionare, përmes një e-maili në 27 tetor 2015 i thotë ish-zv.ministrit Klodiuan Rjepaj: “Pa ardhë përfshirja e Avokatit të Shtetit është shpejt për t’u ulur për kontratë me italianët”.

Gjykata e Posaçme arsyeton se ish-ministri i Shëndetësisë, Ilir Beqaj dhe ish-zv.ministri i Shëndetësisë, Klodian Rjepaj ishin në dijeni që fituesit ishin pikërisht personat me të cilët ata kanë pasur komunikime të vazhdueshme, si edhe kanë udhëtuar së bashku me ta jashtë vendit.

Sipas hetimit të SPAK, në të njëjtën kohë rezulton se komunikime të Klodian Rjepajt dhe Umbro Staçinit, biznesmenit italian të SaniService, shoqërisë që fitoi koncesionin, i janë bërë me dije edhe ish-ministrit Beqaj.

Gjykata e Posaçme bën përgjegjës ish-ministrin edhe për faktin se si titullar i autoritetit kontrator, duhet të kishte pezulluar procedurën e prokurimi, në një kohë që ka pasur ankim nga një prej garuesve për koncensionit. Referuar gjykatës, Beqja jo vetëm nuk ka pezulluar procedurën, por as nuk ka ngritur një komision me tre anëtarë, që nuk duhet të ishin pjesë e Komisionit të Koncesionit.