Reshjet gjatë natës/ Përmbytje në Shkodër, Vlorë e Durrës, reagojnë autoritetet: Duhet koordinim!

Reshjet e shiut gjatë natës kanë sjellë përmbytje në disa zona e qytete të Shqipërisë. Shkodra është një ndër këto qytete ku kryebashkiakja në detyrë, Voltana Ademi ishte në Obot, një ndër zonat më problematike dhe tha se situata është përkeqësuar.

Sipas saj deri më tani nuk ka nevojë për evakuime, por ka dëme të konsiderueshme në tokat bujqësore, ku nën ujë janë rreth 1600 ha tokë.

“Situata nga mbrëmë deri sot është përkeqësuar. Deri në këtë orë kemi 1600 ha tokë të përmbytur. Hidrometri në Urrelë dhe Dajç shënon 6 metër mbi nivelin e detit duke u rritur 20 cm nga mëngjesi deri tani. bëhet fjalë për probleme në Obot. Këtu jemi në Obot, në NJA Ana e Malit. Kemi probleme Obligë, Muriqan,  në Reç, kemi probleme në Anën e Malit, edhe në Gurin e Zi.

Rruga e Obotit është e pakalueshme. Ka 60 cm lartësi të ujit mbi ujë. Kemi komunikuar me forcat e ushtrisë. Ata sot në mëngjes, para gjysmë ore u soll një mjet për të bërë kalimin e të gjithë atyre që kanë nevojë për aksesin. Në Obot kemi hequr mbrëmë pompat e ujit për shkak të prezencës së ujit të ujësjellës. Shpresoj shumë që të mos kemi probleme. Ka një rritje që më shqetëson. Që do të thotë edhe për përmbytje të tokave të mbjella. Bëhet fjalë për një dëm të konsiderueshëm.

Kam një komunikim nga kesh Aoër 2700 metër kub prurje në kaskadë. Ky informacion duhet të konfirmohet në mënyrë zyrtare. Nuk kemi probleme deri më tani në liqenin e Shkodrës.

Në këto momente nuk kemi nevojë për evakuimin,nevojën e kemi vetëm për transport. Këtu duhet të marrim një përgjegjësi që na takon të gjithëve, nëse ka nevojë për evakuim, kemi 200 shtretër të gatshëm. Në Dajç nuk ka energji. Do të verifikojmë të gjitha”, tha Ademi.

Edhe kryetari i njësisë administrative Novoselë, Kanan Shakaj ka folur lidhur me situatën e krijuar nga reshjet, ku tha se janë rreth 15-20 familje që rrezikojnë në shtratin e lumit të Lushnjes.

“Vjosa ka filluar që dje të rritet niveli. Ka një favor se deti nuk ka baticë. Sa morëm informacion nga Përmeti dhe Memaliaj dhe prurjet janë në nivele të vogla.  Nuk dimë si do vazhdojë dita e sotme.

Ne mendojmë se do të jetë në këto nivele. Kemi rreth 15-20 familje që janë në shtratin e lumit dhe kemi njoftuar blegtorët të heqin bagëtitë dhe mendoj që po nuk vazhduan reshje… nëse ka reshje të fuqishme edhe mund të rrezikojë.

Me të rënë niveli do fillojë direkt nga puna për argjinaturën. Niveli është 6 e 60.  Në 7 e 30 është rrezikues. Në nivelin 7 do largojmë njerëzit. Banorët janë njoftuar. Kryetari i bashkisë ka ndjekur situatën”, u shpreh Shakaj.

Kështu, duke parë situatën e krijuar me reshjet e dendura të shiut, ministrja e Bujqësisë Milva Ekonomi ka thirrur në takim drejtoritë rajonale të Ujitjes dhe Kullimit. Ekonomi bëri apel për koordimin me strukturat përgjegjëse si prefekturat, bashkitë dhe operatori i shpërndarjes së Energjisë Elektrike.  Ajo theksoi se është e rëndësishme që hidrovoret në mbarë vendin të furnizohen me energji elektrike.

“Në ambientet e Ministrisë së Bujqësisë dhe Zhvillimit Rural u zhvillua takimi me Drejtorikë Rajonale të Ujitjes dhe Kullimit (DRUK), si institucionet përgjegjëse të infrastrukturës ujorë në vend. Dukë marrë shkas nga reshjet intensive të shiut dhe parashikimet për ditët e ardhshme, Ministrja Ekonomi u informua mbi gjëndjen aktuale dhe situatën  në terren

Gadishmëria e sistemit, ishte kryefjala e takimit dhe si hapi më emergjent në përballimin e kësaj situate mbetej koordinimin me strukturat e tjerë përgjegjëse si Prefekturat, Bashkitë dhe Operatorin e Shpërndarjes së Energjisë Elektrike (OSHEE). Për momentin është shumë e rëndësishme që hidrovoret në mbarë vendin të furnizohen pandërprerje me energji elektrike dhe DRUK të koordinohen në evidentimin e cdo problematike që vjen nga vështirësitë e motit dhe të adresohen pa humbur kohë.

Në fjalën e saj Ministrja Ekonomi riktheu në vëmendje turin e takimeve të javës së parë të punës, me detyrat përkatëse që u lanë për cdo rajon që infrastruktura e hidrovoreve, kanaleve të para dhe sistemi I kullimit të jetë në gjendje të përballojë këtë periudhe intensive reshiesh. Komunikimi do të vazhdojë dhe gadishmëria e strukturave në terren do të jetë maksimale”, thuhet në njoftimin e Ministrisë së Bujqësisë.

Më herët u raportua për përmbytje edhe në Vlorë, Durrës e Fushë-Krujë.