Posta e mëngjesit/ Me 2 rreshta: Çfarë pati rëndësi dje në Shqipëri

■ Negociatat/ Pse Bullgaria dhe Holanda nuk dhanë ‘dritën e gjelbër’ për konferencën e parë ndërqeveritare me Shqipërinë dhe Maqedoninë e Veriut.

■ Tre eurodeputetë letër Borrell: Raportuam problemet me blerjen e votës, pse s’përmendet në raport- progresin e 2020-tës.

■ “Pranuam nga halli”, Naftëtarët e Ballshit firmosën zgjidhjen e pjesshme, por Rama 'u la sërish në derë' problemin që i çoi drejt grevës. Miratohet ndihma financiare për naftëtarët, sa muaj do paguhen dhe kriteret e përfitimit.

■ Këshilli i Ministrave miraton paketën e rimbursimit të barnave për të infektuarit me covid-19. Paketa për trajtimin ambulator në banesë përbëhet nga dy skema.

■ Enigma e vrasjes në Fier, Gjykata jep masën e sigurisë "arrest me burg" për Fatmir Hoxhajn; 52-vjeçari: Jam i pafajshëm! Avokatja mbrojtëse: Kishte alibi, por nuk rendiste dot provat nga emocionet.

■ "Ligjet" shpërfillin shqetësimin e Metës, rrëzojnë dekretin për kthimin në Kuvend të "Gjendjes Civile"; Presidenca: Komisioni humbi edhe grimcat e fundit të etikës! Thirrje Kuvendit njëpartiak të miratojë dekretin.

E lidhur: Skandali i listave të zgjedhësve, denoncon ish-deputeti: Më kanë ç'regjistruar mua dhe 300 banorë të Dropullit pa dëshirën dhe dijeninë tonë!

■ Akuzat për krime lufte, ish-drejtuesit e UÇK-së në seancën e dytë para "Speciales"; Mbrojtja: Na duhet më shumë kohë! Gjykimi nuk duhet të nis para qershorit 2022. Prokuroria: Kemi 1500 prova dhe 153 dëshmitarë që e konfirmojnë akuzën! Kërkojmë masa mbrojtje për disa prej tyre.

E lidhur: Avokati i ish-Presidentit: Nuk pranojmë burgimin e Thaçit! Do kërkojmë lirimin me kusht! Të bëhet ndarja e të akuzuarve

■ Në 24 orët e fundit në vendin tonë janë regjistruar nëntë humbje jete dhe 711 raste të reja me COVID-19. Ministria e Shëndetësisë raportoi se janë kryer 2574 testime, ndërsa janë shëruar 412 persona. Sipas MSH, në 3 spitalet COVID, po trajtohen 420 pacientë. 

■ Kongresmeni amerikan Eliot Engel ka thënë se kushdo që ka kryer krime lufte duhet të dalë para drejtësisë. Sipas tij, kjo po ndodh vetëm në Kosovë, ndërsa theksoi se duhet hetuar pavarësisht nga përkatësia etnike.

■ Shqipëria triumfon dhe e mbyll me fitore këtë edicion të Nations League. Kombëtarja ka arritur të mposhtë me rezultatin 3-2 Bjellorusinë në "Air Albania". Golat për kuqezinjtë u shënuan nga Cikalleshi dhe Manaj në pjesën e parë duke arritur kështu fitoren e tretë radhazi.

■ Masat e reja të miratuara për pandeminë kanë detyruar Kuvendin që të anulojë seancat plenare. Sot nuk do të ketë Kuvend. Nga kjo javë administrata do të punojë me orar të plotë, por me personel të reduktuar. Përfitojnë janë ata që kanë fëmijë në shkollë, deri në klasë të VI. 

■ Kreu i Partisë Agrare Ambientaliste, Agron Duka ka rezultuar pozitiv me Covid 19.