Zjarr brenda një banese në Kurbin, humb jetën fëmija 2-vjeçar

Flakët e zjarrit kanë përfshirë një banesë në fshatin Sanxhak të Kurbinit duke i marrë jetën një fëmije 2 vjeçar.

Përmes një njoftimi zyrtar, policia sqaron se fëmija është gjetur i asfiksuar pa jetë brenda kësaj banese dhe me shenja djegie.

Në vendngjarje ndodhen forca të policisë dhe zjarrfikësja.

“Sot, rreth orës 15:00, në banesën e shtetasit H.Ç., banues në Sanxhak, Kurbin, ka rënë zjarr, ku pas mbërritjes së shërbimeve të Policisë dhe zjarrfikëses, në ambjentet e brendshme të banesës është konstatuar trupi i pajetë i një të mituri, 2-vjeçar.

Nga veprimet e para hetimore rezulton se fëmija ka ndërruar jetë si pasojë e asfiksisë dhe djegies.

Në vendngjarje grupi hetimor po punon për zbardhjen e plotë të ngjarjes”, thuhet në njoftimin zyrtar të policisë.