Flash News

Numërohen 5 kuti në qarkun e Gjirokastrës, ja si ndahen votat

E-TJERA

Nisin zyrtarisht dëbimet nga Italia drejt Shqipërisë , 15 të parët mbërrijnë, vijon transporti

Politiko 9 Prill 2025, 20:47

Nisin zyrtarisht dëbimet nga Italia drejt Shqipërisë , 15 të

Një anije ushtarake italiane me 15 emigrantë është nisur nga porti i Brindisit drejt Shqipërisë, duke shënuar transportin e radhës në kuadër të marrëveshjes mes qeverisë italiane dhe asaj shqiptare për menaxhimin e emigrantëve jashtë territorit të BE-së. Sipas burimeve zyrtare, një tjetër grup prej 25 emigrantësh pritet të niset mbrëmjen e sotme drejt vendit tonë, duke e çuar në 40 numrin total të personave që do të vendosen në kampin e Gjadrit.

Këta emigrantë, të cilët kanë marrë urdhër dëbimi nga territori italian, do të strehohen në qendrën e posaçme në Gjadër, tashmë e shndërruar në një strukturë për riatdhesim sipas draftit të ri të miratuar nga qeveria e Giorgia Melonit.

Në muajin janar të këtij viti, Shqipëria priti grupin e tretë dhe më të madh të emigrantëve në qendrën e pritjes në Shëngjin, pas dy rasteve të mëparshme në tetor dhe nëntor 2024. Në të dyja rastet, gjykatat italiane nuk e kishin vërtetuar ndalimin e azilkërkuesve në objektet shqiptare, duke pezulluar përkohësisht zbatimin e marrëveshjes.

Kontestimet ligjore lidhen kryesisht me përkufizimin e vendeve të origjinës së azilkërkuesve dhe mungesën e një liste të përbashkët të “vendeve të sigurta” mes shteteve të BE-së. Qeveria italiane ka mbrojtur qëndrimin e saj, duke theksuar nevojën për lista të personalizuara për secilin vend anëtar.

Më 30 dhjetor 2024, Gjykata e Kasacionit në Itali i dha të drejtë ekzekutivit italian, duke konfirmuar se përcaktimi i vendeve të sigurta është kompetencë ekskluzive e Ministrisë së Jashtme dhe ministrive të tjera përkatëse, dhe jo e gjykatësve të çështjeve individuale.

Marrëveshja për ndërtimin dhe funksionimin e këtyre qendrave u nënshkrua në vitin 2023 mes kryeministres italiane Giorgia Meloni dhe kryeministrit shqiptar Edi Rama. Ajo ka ngjallur kritika të forta nga organizatat ndërkombëtare të të drejtave të njeriut, të cilat e shohin si një përpjekje për të zhvendosur problemin e emigracionit në vende më të dobëta ekonomikisht dhe ligjërisht.

Opozita italiane e ka quajtur këtë projekt të kushtueshëm dhe joefikas, me një kosto prej rreth 800 milionë euro për pesë vite, ndërsa ka theksuar se ai përfaqëson vetëm një pjesë të vogël të fluksit të përgjithshëm të emigrantëve që hyjnë në Itali çdo vit.

Ndërkohë, Komisioni Evropian dhe disa liderë të BE-së kanë shprehur interes për modelin italian-shqiptar, duke e konsideruar si një alternativë për menaxhimin e emigracionit jashtë kufijve të unionit.

Të fundit