Nisma e PS për herë të dytë, cilat janë hapat ligjorë që do të ndiqen për shkarkimin e Ilir Metës

Ashtu siç kishte paralajmëruar kryeministri Edi Rama para zgjedhjeve të 25 prillit, Partia Socialiste ka konkretizuar këtë të hënë nismën për shkarkimin e Presidentit të Republikës, Ilir Meta.

50 deputetë të Kuvendit kanë firmosur një kërkesë, të cilën më pas e kanë depozituar në adresë të kreut të Kuvendit, Gramoz Ruçi për shkarkimin e kreut të shtetit, pasi sipas tyre ka kryer shkelje të Kushtetutës, para dhe gjatë fushatës zgjedhore.

Në kërkesë thuhet se nisma vjen me qëllimin e sigurimit të besueshmërisë së popullit te roli i kreut të Shtetit si një nevojë e shteti të së Drejtës dhe se ka cenuar ndjeshëm besueshmërinë e qytetarëve tek roli i Presidentit dhe nuk e ka ushtruar detyrën e tij në përputhje me Kushtetutën.

Ndërkohë, po në 3 maj, u mblodh Konferenca e Kryetarëve ku vendosi zhvillimin e seancave plenare në datat 4 maj, 6 maj, 13 maj dhe 20 maj 2021. 

Procedurat për shkarkimin e Metës vijnë për herë të dytë brenda dy viteve të fundit. Në korrik të 2019-ës, Parlamenti miratoi ngritjen e një komisioni të posaçëm për të hetuar rreth dekretit të Presidentit Meta për anulimin e zhvillimit të Zgjedhjeve Lokale 2019, më 30 qershor, por ishte Komisioni i Venecias, ai i cili në opinionin e tij i cilësoi i dekretet e Metës si "tejkalim i kompetencave kushtetuese, që nuk përbënin akt për shkarkimin e tij.   

Edhe sot, Kreu i Grupit Parlamentar të Partisë Socialiste, Taulant Balla, tha se nisma e parë për shkarkimin e Presidentit Meta nuk u konkludua në respekt të opinionit të Komisionit të Venecias.

Hapat ligjor për shkarkimin e Metës

Pas shqyrtimit në Kuvend të kërkesës së PS, do të kalojë në Komisionin e Ligjeve, prej ku do t’i hapet më pas rruga ngritjes së Komisionit të Posaçëm Hetimor, për të vërtetuar nëse qëndrojnë dyshimet e ngritura.

Në komision, parashikohet të thirret në seancë dëgjimore edhe presidenti Meta. Pas grumbullimit të fakteve dhe provave, hartohet një raport që i kalon më pas seancës parlamentare ku nevojitet një shumicë e cilësuar prej 94 votash, ku do të votohet për shkarkimin ose jo të kreut të shtetit.

Votimi pritet të bëhet pas 3 muajve, kur anëtarët e Komisionit hetimor do të paraqesin në Parlament raportin e tyre.

“Kuvendi ka tagrin për të ushtruar detyrën deri më 8 korrik. 60 ditë sipas Kushtetutës. Derisa komisioni i ligjeve ta shqyrtojë kërkesën”, tha Balla pas mbledhjes së Konferencës së Kryetarëve.

Megjithatë, pas këtyre hapave, verdiktin përfundimtar për shkarkimin ose jo të Presidentit Meta do ta japë Gjykata Kushtetuese.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm