Flash News

“47 ditë, ne nuk tërhiqemi”/ Pankartat pikante nga protesta

Amnistia nxjerr nga qelia Sokol Sanxhaktarin, dhëndrin e ish-kryebashkiakut të Elbasanit

Aksident në aksin Elbasan-Librazhd, humb jetën 19-vjeçari

Vrasja e Martin Canit: Nga TikTok-u te algoritmi, si ndryshoi narrativa e Ramës për ‘fajtorin’

Ndotje mjedisore në Dhërmi/ IKMT pezullon dhe gjobit 5 kompani

E-TJERA

Mira Murati sfidon gjigantët e AI, kompania e saj prezanton modelin e ri “Inkling”

Politiko 16 July 2026, 20:48

Mira Murati rikthehet në skenën kryesore të inteligjencës artificiale me një projekt të ri ambicioz. Kompania e themeluar prej saj, Thinking Machines Lab, ka prezantuar modelin e parë të madh të inteligjencës artificiale, të quajtur Inkling.

Modeli i ri synon të jetë një alternativë më fleksibël për zhvilluesit dhe bizneset, pasi ofrohet me “pesha të hapura”, duke u lejuar përdoruesve ta shkarkojnë, përshtatin dhe trajnojnë sipas nevojave të tyre specifike.

Inkling është një model multimodal, që do të thotë se mund të përpunojë lloje të ndryshme informacioni, përfshirë tekste, imazhe dhe materiale audio. Përgjigjet e tij aktualisht gjenerohen në formë teksti, por mund të përfshijnë edhe kode kompjuterike, të dhëna të strukturuara dhe materiale të formatuara.

Sipas kompanisë, modeli përmban rreth 975 miliardë parametra, por gjatë përdorimit aktivizon vetëm një pjesë të tyre, rreth 41 miliardë, falë arkitekturës “mixture of experts”. Kjo teknologji synon të ulë kostot e përpunimit dhe të rrisë shpejtësinë e përgjigjeve, duke përdorur vetëm kapacitetin e nevojshëm për çdo detyrë.

Thinking Machines Lab bën të ditur se Inkling është trajnuar me rreth 45 trilionë njësi të dhënash, të përfshira nga tekste, imazhe, audio dhe video.

Megjithatë, kompania pranon se modeli i ri nuk është aktualisht më i fuqishmi në treg, krahasuar me sistemet më të avancuara të inteligjencës artificiale. Objektivi i tij është tjetër: të krijojë një bazë që kompanitë dhe zhvilluesit mund ta përshtatin me informacionet, proceset dhe nevojat e tyre të brendshme.

Përmes platformës Tinker, shërbimit të saj për trajnimin dhe personalizimin e modeleve, Thinking Machines Lab synon t’u japë përdoruesve më shumë kontroll mbi mënyrën se si ndërtohen dhe përdoren sistemet e inteligjencës artificiale.

Me këtë lançim, Mira Murati, ish-drejtoreshë teknologjike e OpenAI, rikthehet në një industri ku kompanitë më të mëdha globale po garojnë për dominimin e teknologjive të reja të AI, duke vendosur fokusin te personalizimi, transparenca dhe përdorimi më i hapur i modeleve.

Të fundit