Shpenzimi mesatar i shqiptarëve për shërbimet celulare u rrit për të pestin vit radhazi

Një përdorues shpenzoi vitin e kaluar mesatarisht pothuajse 9700 lekë ose afërsisht 99 euro për shërbime të komunikimeve celulare.

Sipas të dhënave nga Autoriteti i Komunikimeve Elektronike dhe Postare (AKEP), vitin e kaluar shpenzimi mesatar i shqiptarëve për këto shërbime u rrit me afërsisht 6% krahasuar me një vit më parë. Kjo vlerë mbështetet në treguesin e të ardhurave mesatare për përdorues të operatorëve celulare (ARPU) dhe llogaritet si raport i të ardhurave nga shërbimet me pakicë me numrin total të përdoruesve aktivë.

Sipas këtij treguesi, shpenzimi mesatar i shqiptarëve për shërbimet celulare u rrit për të pestin vit radhazi.

Gjithashtu, shpenzimi mesatar i shqiptarëve për çdo minutë thirrje celulare vitin e kaluar u rrit në 7 lekë për minutë (5.86 lekë/minutë, pa TVSH), në rritje me 6% krahasuar me një vit më parë. Kjo vlerë bazohet në treguesin e të ardhurave mesatare për minutë (ARPM), që llogaritet si raport i të ardhurave nga shërbimet me pakicë me sasinë e minutave dalëse dhe tregon të ardhurat e sipërmarrësit për një minutë.

Ulja e numrit të operatorëve në tregun celular ka sjellë një rritje graduale të çmimeve në tre vitet e fundit, si për planet tarifore me kontratë, ashtu edhe për paketat me parapagesë.

Kjo po sjell të ardhura më të larta për operatorët dhe në një përmirësim të performancës së tyre financiare, pas një dekade të karakterizuar nga rezultate përgjithësisht të ulëta, si pasojë e konkurrencës së ashpër në treg.

Sipas informacionit të raportuar në Autoritetin e Komunikimeve Elektronike dhe Postare (AKEP), dy operatorët celularë fituan afërsisht 3.4 miliardë lekë për 2025. Fitimi i operatorëve u rrit me 102% krahasuar me një vit më parë.

Vodafone Albania arriti një fitim neto në vlerën e rreth 1.7 miliardë lekëve, ndërkohë që një vit më parë kishte realizuar një fitim neto prej rreth 1.2 miliardë lekësh.

Një fitim në vlerë të njëjtë ka raportuar edhe One Albania, por që e ka përmirësuar edhe më shumë, me 257% krahasuar me vitin 2024.

Dy operatorët e rrjeteve celulare, Vodafone Albania dhe One Albania, vitin e kaluar raportuan të ardhura prej komunikimeve elektronike në vlerën 28.95 miliardë lekë, në rritje me 3.7% krahasuar me një vit më parë. Në ndarjen e tregut sipas xhiros së gjeneruar nga segmenti celular, dy operatorët kanë ruajtur të njëjtat raporte si në vitin 2024. Vodafone Albania zotëronte rreth 58% të të ardhurave totale të tregut celular, ndërsa One Albania 42% të tyre.

Përdorimi i shërbimeve celulare është gjithnjë e më i përqendruar te interneti, ndërkohë që shërbimet e tjera paraqiten në rënie.

Në vitet e fundit, edhe tregu shqiptar po reflekton tendencën e përgjithshme globale të zhvendosjes së komunikimit drejt aplikacioneve OTT (Over The Top) të lidhura me internetin. Kanalizimi i thirrjeve dhe mesazheve nëpërmjet aplikacioneve, si whatsapp, e ka ulur gradualisht përdorimin e shërbimeve tradicionale të mbështetura mbi rrjetet GSM, si thirrjet zanore apo SMS. / Monitor