Flash News

Zbulohen 5 'shtëpi bari' në Lezhë, dy në pranga, procedohen 4 punonjës të OSHEE

Auditorët e BE ‘nxijnë’ Shqipërinë: Projektet e transportit, të ngadalta dhe të pambikëqyrura

Këmbimi valutor, me sa lekë blihen e shiten valutat kryesore sot

"La Roja" në finalen e Botërorit, Franca dorëzohet në gjysmëfinale

"La Roja" godet e para! Spanja merr avantazhin ndaj "Gjelave"

E-TJERA

Zbulohen 5 'shtëpi bari' në Lezhë, dy në pranga, procedohen 4 punonjës të OSHEE

Politiko 15 July 2026, 10:46

lezhe-shtepo-bari.jpg

Një operacion i policisë ka zbuluar pesë ambiente të përshtatura për kultivimin e kanabisit në qarkun e Lezhës, ndërsa dy persona kanë përfunduar në pranga.

Aksioni i koduar “Lightning” u zhvillua në fshatin Velë, pas disa javësh hetime dhe informacionesh operative për kultivim të lëndëve narkotike në ambiente të mbyllura dhe në parcela të hapura.

Gjatë kontrolleve, uniformat blu zbuluan ambiente të pajisura me llamba dhe sisteme të posaçme për rritjen e bimëve narkotike. Në total u asgjësuan 174 bimë Cannabis Sativa, ndërsa u arrestuan në flagrancë dy persona.

Sipas policisë, në pranga ranë M. F., 39 vjeç, pronar i banesës ku ishte ngritur një nga ambientet e kultivimit, si dhe A. M., 27 vjeç, banues në Ishull Shëngjin.

Gjatë kontrollit në banesën e 39-vjeçarit, policia gjeti një hapësirë të përshtatur me pajisje elektrike dhe ndriçim artificial, ku ishin kultivuar 119 bimë narkotike. Sipas hetuesve, furnizimi me energji elektrike realizohej përmes lidhjeve të paligjshme.

Në të njëjtën banesë u zbuluan edhe dy ambiente të tjera të përgatitura për kultivim, ndërsa pranë saj u gjetën edhe dy parcela me 55 bimë të tjera kanabisi.

Gjatë operacionit u sekuestruan dy armë gjahu, pajisje elektrike të përdorura për kultivimin e kanabisit, një sasi lënde të dyshuar narkotike, një automjet dhe 18 aparate celularë.

Policia bëri të ditur se gjatë kontrollit në banesën e 27-vjeçarit u gjetën edhe 16 celularë të tjerë, për të cilët vijojnë verifikimet për mënyrën e sigurimit dhe qëllimin e përdorimit.

Në kuadër të hetimeve janë proceduar penalisht edhe katër punonjës të OSHEE-së, me detyra shef grupi, lexues dhe elektricistë. Ata dyshohen për veprat penale “shpërdorim detyre” dhe “korrupsion pasiv”, pasi dyshohet se kanë favorizuar aktivitetin përmes ndërhyrjeve në furnizimin me energji.

Hetimet vijojnë për identifikimin e personave të tjerë që mund të kenë qenë të përfshirë në këtë veprimtari kriminale. Materialet procedurale i janë referuar Prokurorisë së Lezhës për veprime të mëtejshme.

Të fundit