Media britanike: Koncerti i Kanye West në Tiranë ndezi zemërimin mes protestave kundër Ramës

 

Revista britanike IQ Magazine i ka kushtuar një analizë koncertit të Kanye West në Tiranë, duke e lidhur organizimin e tij me debatet politike që kanë shoqëruar financimin nga qeveria shqiptare.

Artikulli thekson se koncerti u zhvillua ndërsa në kryeqytet vijojnë prej javësh protestat qytetare kundër qeverisë së Edi Ramës, kurse vendimi për përdorimin e fondeve publike për aktivitetin ka nxitur kritika të shumta brenda dhe jahstë vendit.

Shkrimi i plotë: 

Ye, artisti i njohur më parë si Kanye West, mbajti të shtunën (11 korrik) një nga koncertet më të mëdha të organizuara ndonjëherë në Shqipëri, duke nxitur kritika ndaj mbështetjes financiare të qeverisë për projektin në një kohë kur Tirana po përjeton javë të tëra protestash masive kundër qeverisë.

Artisti kontrovers mblodhi rreth 60 mijë spektatorë në një stadium të përkohshëm të ndërtuar posaçërisht në Tiranë. Projekti u miratua si pjesë e një strategjie më të gjerë për nxitjen e turizmit nga autoritetet shqiptare, përfshirë edhe kryeministrin Edi Rama.

Për organizimin e koncertit u ndërtua stadiumi i përkohshëm "Eagle Stadium", me një kapacitet trefish më të madh se stadiumi më i madh ekzistues në vend, Arena Kombëtare me 22.500 vende. Sipas raportimeve, ndërtimi i tij mendohet të ketë kushtuar mbi 50 milionë euro.

Vetëm pak ditë para koncertit, Rama njoftoi se qeveria do të përdorte 400 milionë lekë (rreth 4 milionë euro) nga fondi rezervë i shtetit për garantimin e sigurisë së aktivitetit. Sipas tij, koncerti pritej të sillte mbi 100 milionë euro të ardhura për ekonominë shqiptare.

Fillimisht ishte bërë e ditur se koncerti, i organizuar nga Streetlife International, do të financohej tërësisht nga shitja e biletave, ndërsa Ministria e Kulturës kishte vetëm rolin e lehtësimit të procedurave për zhvillimin e tij.

Megjithatë, shumë kritikë e kanë cilësuar koncertin dhe financimin e tij në momentet e fundit si një përpjekje për të larguar vëmendjen nga protestat që kanë vazhduar çdo ditë për më shumë se një muaj.

Protestat nisën si kundërshtim ndaj një projekti për ndërtimin e një resorti luksoz në bregdet, por më pas u zgjeruan duke përfshirë kundërshtime për zhvillimet në zonat e mbrojtura, ndërtimet në vijën bregdetare dhe akuzat për korrupsion ndaj qeverisë, sipas Organised Crime and Corruption Reporting Project (OCCRP).

Në reagimin e tij, Rama shkroi në Facebook:

"‘Nuk kemi bukë, nuk na duhet kultura’? Gabim. Kultura nuk është vetëm ushqim shpirtëror, por edhe ekonomi, turizëm dhe zhvillim. Ta paraqesësh një investim të tillë si para të shpërdoruara do të thotë të mos kuptosh se si krijohet vlera ekonomike nga ngjarjet kulturore dhe sportive. Përkundrazi, anulimi i koncertit do të ishte një turp për Shqipërinë dhe një dëm i madh për imazhin e vendit."
Kryeministri shtoi se një koncert i këtyre përmasave nuk është thjesht një aktivitet artistik.

"Është marketing global për Shqipërinë, një reklamë që do të kushtonte shumë më tepër nëse blihej përmes fushatave tradicionale. Kjo nuk është një shpikje shqiptare. Kështu veprojnë vendet më të zhvilluara të Europës. Kush mendon se kultura është luks, duhet ta rishikojë këtë bindje të gabuar."
Rama deklaroi gjithashtu se nga rreth 60 mijë pjesëmarrësit, mbi 40 për qind ishin vizitorë nga jashtë, të cilët kishin udhëtuar drejt Shqipërisë për të ndjekur koncertin, një nga vetëm pak ndalesat evropiane të Ye gjatë këtij viti.

"Shqipëria nuk fiton duke u fshehur nga bota. Shqipëria fiton duke e sjellë botën në shtëpinë e saj."
Pas koncertit, vetë Ye falënderoi publikisht Shqipërinë, duke shkruar:

"Faleminderit Edi Rama dhe gjithë Shqipërisë që ndërtuat një stadium dhe më mirëpritët në vendin tuaj të bukur."
Koncerti në Tiranë ishte një nga të paktët që Ye arriti të zhvillojë këtë vit, pasi performancat e planifikuara në Indi, Francë, Poloni, Mbretërinë e Bashkuar dhe Itali u anuluan, ndërsa autoritetet lokale dhe qeveritë e këtyre vendeve ndërmorën hapa për të penguar organizimin e tyre.

Aktualisht, ai pritet të përmbyllë turneun evropian me koncerte në Spanjë dhe Portugali, përpara se të rikthehet në SHBA për performanca në New Orleans dhe Chicago.

Në vitet e fundit, Kanye West është përfshirë në polemika të shumta për deklarata antisemite, raciste dhe pro-naziste, përfshirë publikimin e këngës "Heil Hitler". Ai ka deklaruar se sjelljet e tij kanë qenë të lidhura me çrregullimin bipolar dhe ka kërkuar falje publikisht.