"Largohu", Gjiknuri dhe Manja përplasen për projektligjin e tokave bujqësore

Projektligji për “tokat bujqësore” ka nxjerrë në pah përplasjet në Partinë Socialiste.

Damian Gjiknuri i ka kerkuar fjalën Ulsi Manjës që i është refuzuar nga ky i fundit dhe ka braktisur mbledhjen.

“Më jep fjalën ose po largohem”. “Mund të ikësh”, I ka thënë Manja.

Grupet e interesave brenda socialistëve po e shfaqin edhe publikisht tensionin e lartë që ka përfshirë kapmin e rilindjes

Komisioni Komisioni për Çështjet Ligjore dhe Administratën Publike mban sot mbledhjen e radhës dhe mes diskutimeve ishte edhe Shqyrtimi i projektligjit “Për disa shtesa dhe ndryshime në ligjin nr. 9244, datë 17.6.2004, “Për mbrojtjen e tokës bujqësore”, të ndryshuar”.

Mes çështjeve të diskutuara mbi këtë projektligj ishte ndikimi që do të ketë në tokën bujqësore instalimi i impianteve eolike. I pari që kundërshtoi ishte deputeti i PD, Oerd Bylykbashi, i cili u shpreh se këto impiante kërkojnë shpim të tokës dhe vendosjen e një platforme të madhe betoni, që do të dëmtonte tokën.

Tezën e tij e mbroi edhe deputeti i PS, Damian Gjiknuri, i cili bashkë me dy deputetët e PD, votoi kundër për nenin 1 të këtij projektligji dhe më pas kërkoi sqarime nga përfaqësuesit e drejtorisë përkatëse, që nga ana e tyre u shprehën se strukturat do të ngulen direkt në tokë dhe pa struktura betoni.

“Që të vësh një kullë për ‘ëind farm’, është 100 metra e lartë dhe nuk ka shans të vendoset pa strukturë betoni. Bëhet fjalë për kulla shumë të larta. Nuk jam i bindur me shpjegimet tuaja”, u shpreh Gjiknuri mes të tjerash.

Debati vijoi edhe në momentin e fundit të votimit të komplet projektligjit, ku Strazimiri kërkoi të vazhdonte me pyetjet mbi paqartësitë, por u kundërshtua nga kryetari Manja. Ky i fundit u përplas edhe me Gjiknurin dhe pas një debati, ky i fundit la mbledhjen.

Strazimiri: Kam pyetje.

Manja: U ezauruan.

Strazimiri: Po unë s’kam mbaruar gjimnazin bujqësor. Kam pyetje për ty.

Manja: Po.

Strazimiri: Fakti që në projektligj kanë sjellë edhe shënimin “eolik”, ka një problem këtu. Është një instrument që jepet në dorë edhe të njerëzve të papërgjegjshëm në të ardhmen. Urgjenca që keni për këtë ligj do të thotë se po bëni dëm. Nuk po na lini të sqarohemi.

Manja: Në rregull, e gjetët lepurin në ferrë ju të tre (Bylykbashi, Strazimiri dhe Gjiknuri).

Gjiknuri: Një sekondë, sepse nuk u sqaruam, më jep fjalën.

Manja hedh për votim ligjin dhe e miraton, teksa votën e Gjiknurit e konsideron si abstenim.

Gjiknuri: Do më jepni fjalën apo të largohem fare.

Manja: Mund të ikësh, rri te abstenimi ti. Merru me Oerdin.

Gjiknuri: Në rregull, po largohem.