Ekzekutimi nga mafia shqiptare u filmua me dron, policia australiane: Një epokë e re e krimit të organizuar

Nga Damian Murphy, 7NEWS

Policia australiane ka shpallur një epokë të re të krimit të organizuar, pasi vrasësit përdorën një dron për të filmuar një ekzekutim mafioz në Sidnej këtë javë — dhe më pas e publikuan videon në internet.

Jack Cheung, 35 vjeç, u qëllua për vdekje jashtë shtëpisë së tij në Carlingford, në veriperëndim të Sidnejt, të mërkurën në mëngjes.

Ai u gjet i pajetë në hyrjen e shtëpisë së tij në North Rocks Road, rreth orës 05:30, ndërsa trupi i tij u zbulua vetëm 90 minuta më vonë, kur hidraulikët mbërritën për të punuar në banesë. 
 
Disa orë më vonë, detektivët e policisë së New South Wales (NSW) bënë një thirrje publike për pamje nga kamerat e sigurisë (CCTV) dhe kamerat e makinave (dashcam), për të ndihmuar hetimin.

Por ishin vetë vrasësit që iu përgjigjën kësaj thirrjeje, duke publikuar pamje ajrore të filmuara me dron, ku shihej autori duke iu afruar Cheung-ut dhe duke e qëlluar për vdekje jashtë shtëpisë së tij.

Pamjet sfiduese u publikuan gjatë natës në një platformë të rrjeteve sociale, të shoqëruara me një mesazh të shkurtër.

“Përshëndetje, kjo është mafia shqiptare; kemi pamje të ekzekutimit të zotit Cheung nga bandat sot në Carlingford.” 
“Kjo është shqetësuese,” tha zëvendëskomisioneri i Policisë, Scott Cook.

“Është një epokë e re në krimin e organizuar.”

Ndërkohë, shefi i Policisë së NSW-së, Mal Lanyon, tha se ka shqetësimet e tij, pasi bota e krimit në Sidnej tashmë po publikon rregullisht pamje të ekzekutimeve mafioze në platforma publike.

“Publikimi i tyre në internet mund të nxisë persona të tjerë të ndërmarrin veprime të tilla,” tha ai.

Lanyon shtoi gjithashtu se kjo prirje mund të kthehet kundër vetë bandave kriminale.

“Pamjet që publikohen në internet na ndihmojnë edhe ne në hetimet tona,” tha ai.

U gjet një pajisje GPS në makinën e viktimës

Publikimi i pamjeve me dron vjen pak pasi u zbulua se në makinën e Cheung-ut ishte gjetur e instaluar një pajisje gjurmimi GPS, përpara se ai të binte në pritë dhe të ekzekutohej.

Cheung jetonte në atë banesë së bashku me nënën e tij, e cila të mërkurën ishte duke u kthyer me nxitim nga një pushim në Tajlandë.

Pamjet e kamerave të sigurisë tregojnë se autori mbërriti me një SUV në orën 05:31 dhe qëndroi në zonë vetëm tre minuta. Megjithatë, detektivët e vrasjeve ende po hetojnë momentin e saktë kur 35-vjeçari u plagos për vdekje.

Policia vazhdon kërkimet për autorin dhe automjetin e përdorur prej tij.

 
Sipas 7NEWS, vëllai i Cheung-ut është anëtar i ‘Coconut Cartel’, një nga grupet më famëkeqe kriminale të Sidnejt, i cili u shfaq fuqishëm në botën e krimit të qytetit në fillim të këtij viti.

Detektivët po hetojnë nëse vrasja ka lidhje me luftërat mes bandave kriminale.

“Nuk është diçka që e përjashtojmë, por as nuk mund ta konfirmojmë në këtë moment,” u tha gazetarëve të mërkurën zëvendëssuperintendenti i Policisë së NSW-së, Michael Marinello.

Policia konfirmoi gjithashtu se Cheung ishte i njohur për autoritetet. Muajin e kaluar ai ishte paraqitur në gjykatë pasi ishte kapur në posedim të një arme pa leje.

Cheung njihej në lagje për pasionin e tij për makinat, madje merrte pjesë edhe në gara në Eastern Creek. Hyundai i tij ishte jeta e tij – dhe tani është bërë pjesë kyçe e hetimeve për vdekjen e tij.

“E shihnim Jack-un gjatë gjithë kohës. Ishte shumë i sjellshëm, nuk sillej kurrë keq,” thanë fqinjet Isabella dhe Jeanette.

“Gjithçka që bënte ishte të merrej me makinën e tij.”

Fqinjët u tronditën nga sulmi i ndodhur në orët e para të mëngjesit.

“Sinqerisht, nuk kemi asnjë ide. Të gjithë jemi në shok. Ndoshta ishte shoqëruar me njerëzit e gabuar,” thanë Isabella dhe Jeanette.

Fqinjët dëgjuan të shtëna para se të gjendej trupi

Fqinjët i thanë 7NEWS se kishin dëgjuar një të shtënë me armë rreth dy orë para se të bëhej zbulimi makabër i trupit.

Marinello tha se hetimet e deritanishme tregojnë se janë qëlluar disa plumba.

“Duket se bëhet fjalë për një sulm shumë të guximshëm,” tha Marinello.

“Nuk besojmë se ky ishte një sulm i rastësishëm. Besojmë se është një incident i izoluar dhe për këtë arsye mund ta sigurojmë publikun se nuk ka asnjë kërcënim të vazhdueshëm.”

“Në shtëpi kishte njerëz në momentin e ngjarjes dhe ata po bashkëpunojnë me hetimet tona.”

Policia do të marrë në pyetje dëshmitarët dhe do të mbledhë pamje nga kamerat e sigurisë (CCTV), ndërsa hetimet paraprake vazhdojnë.