Vizat/ Rama akuza Holandës: Politikë intensive kundër shqiptarëve; po përdoremi si ‘kokë turku’

Kryeministri i Shqipërisë, Edi Rama lëshoi akuza të forta nga foltorja e Kuvendit ndaj partive politike në Holandë se po zhvillojnë në mënyrë intensive një politikë kundër shqiptarëve, duke iu referuar mocionit për rikthimin e vizave. Sipas Ramës, shqiptarët janë zgjedhur nga disa parti si ‘kokë turku’ në kuadër të fushatës elektorale që po zhvillohet në këtë shtet të Bashkimit Evropian.

“Është një vendim thjesht dhe vetëm politik në vazhdën e një procesi elektoral në një vend si Hollanda, ku nuk është sekret, ka një zhvillim të vazhdueshëm të një politike intensivisht kundër zgjerimit, intensivisht kundër emigrantëve, intensivisht kundër shqiptarëve. Shqiptarët janë zgjedhur nga disa parti në atë vend si një kokë turku për retorikën agresive izolacioniste në raport me zhvillimet përtej kufijve të Hollandës, në BE, dhe agresive kundër politikës evropiane të zgjerimit”, tha Rama.

Rama theksoi se procedura parlamentare e Holandës nuk ka asnjë implikim të drejtpërdrejtë në lëvizjen e lirë të shqiptarëve në zonën Shengen. Ai refuzoi edhe termin “krim etnik” të përdorur në Holandë, duke u shprehur se shqiptarët e proceduar atje përbëjnë vetëm 0,2% të totalit të të gjithë të burgosurve.

“Është një procedurë parlamentare që nuk ka asnjë implikim të drejtpërdrejt në lëvizjen e lirë të shqiptarëve. Të gjithë duhet ta kenë parasysh se për revokimn e lëvizjes së lirë duhet të përmbushen disa objektive dhe asnjë nuk përkon me realitetin e faktorit shqiptar në Hollandë. Dhe më e bukura është se ministri për Drejtësi dhe Siguri, në fjalën e tij, reagoi duke thënë pikërisht këtë, nuk ka asnjë kriter të përmbushur negativisht për të adresuar këtë problematikë me një vendim të parlamentit”, deklaroi kryeministri.

Edi Rama bëri edhe një renditje të kushteve negative që duhet të përmbushen që Shqipërisë t’i rikthehen vizat.

Pjesë nga fjalimi i kryeministrit Rama:

Është një vendim thjeshtë dhe vetëm politik në vazhdën e një procesi elektoral në një vend si Hollanda, ku nuk është sekret, ka një zhvillim të vazhdueshëm të një politike intensivisht kundër zgjerimit, intensivisht kundër emigrantëve, intensivisht kundër shqiptarëve. Shqiptarët janë zgjedhur nga disa parti në atë vend si një kokë turku për retorikën agresive izolacioniste në raport me zhvillimet përtej kufijve të Hollandës, në BE, dhe agresive kundër politikës evropiane të zgjerimit.

Është një procedurë parlamentare që nuk ka asnjë implikim të drejtpërdrejt në lëvizjen e lirë të shqiptarëve. Të gjithë duhet ta kenë parasysh se për revokimn e lëvizjes së lirë duhet të përmbushen disa objektive dhe asnjë nuk përkon me realitetin e faktorit shqiptar në Hollandë. Dhe më e bukura është se ministri për Drejtësi dhe Siguri, në fjalën e tij, reagoi duke thënë pikërisht këtë, nuk ka asnjë kriter të përmbushur negativisht për të adresuar këtë problematikë me një vendim të parlamentit.

Së pari, duhet të ketë një rritje të qëndrueshme të emigracionit të parregullt nga një vend në vendin përkatës të BE. Konsiderohet si rritje e qëndrueshme dyfishimi i atyre që emigrojnë në mënyrë të rregullt. Fakti flet për rënie dhe jo në rritje, e lë më pastaj për dyshim.

Së dyti, numri i azilkërkuesve duhet të jetë dyfish. Jo vetëm që nuk ka një rritje dyfish të azilkërkuesve në Hollandë, por ka rënie.

Së treti, duhet të konstatohet mungesë vullneti në bashkëpunimin midis vendeve për kthimin e emigrantëve të parregullt. Jo vetëm që nuk ka rënie të bashkëpunimit, por rritje të bashkëpunimit e nënvizuar kjo nga autoritetet holandeze.

Së katërti, duhet që vendi që merret në shqyrtim të përbëjë kërcënim për sigurinë kombëtare të vendit që ndërmerr këtë procedurë. Nuk ekziston.

Së pesti, duhet të konstatohet kthimi mbrapa në zbatimin e të gjitha kritereve teknike të përcaktuara për lëvizjen e lirë dhe këto kritere teknike vlerësohen dhe gjykohen në mënyrë sistematike nga Komisioni Evropian, i cili në dhjetorin e kaluar ka nënvizuar se Shqipëria i plotëson të gjitha kriteret.

Thënë të gjitha këto, Qeveria holandeze nuk ka ndërmarrë dhe nuk ka dhënë sinjale se do të ndërmarrë, në kushtet e fushatës elektorale ku shqiptarët janë bërë mish për top nga parti që shkelin dinjitetin e shqiptarëve, t’i adresohet Komisionit Evropian. Më pas, KE nëse ka një kërkesë nga Hollanda merr dhe shqyrton kriteret për të cilat sapo fola. Janë kritere teknike dhe jo politike, bazohen në fakte dhe jo në kallje të frikës te popullata për rrezikun që vjen nga shqiptarët.

Në një vend ku flitet për krim etnik shqiptar dhe ku ka një shifër shumë të thjeshtë, shqiptarët përbëjnë 0,2% të personave me precedentë penale apo me çështje penale në Mbretërinë e Holandës. 0.2% nga 200 mijë njerëz që gjenden në burgjet e atij vendi, shqiptarët nuk janë as 500.

Kjo nuk e minimizon faktin se ka grupe kriminale që veprojnë në atë vend, por nuk mund të hedhë hije mbi bashkëpunimin tonë me autoritetet e Holandës.

Nëse KE, hipotetikisht, gjykon se kriteret objektive janë të gjitha të ndryshme në ato që janë në fakt, atëherë KE nuk vendos por ia dërgon Këshillit Evropian, forumi ku përfaqësohen të gjitha vendet anëtare dhe ku duhet konsensusi i të gjitha vendeve anëtare për të vijuar me procedurën. Dhe në të gjithë këtë skenar imagjinar, nëse arrihet shumica e cilësuar, që nuk është përdorur kurrë, atëherë vendimi i çohet Parlamenti Evropian.

E gjitha ajo që ka ndodhur është futja në funksion e disa partive politike që janë haptazi parti me një vokacion në kundërshtim me vlerat dhe parimet që mbrojnë partitë normale evropianiste.

Pra një lojë e brendshme, me dinamikë të brendshme dhe që nuk impakton asesi, në asnjë mënyrë, lëvizjen e lirë të qytetarëve shqiptarë.

Por nuk është kjo pjesa më e rëndë. Ne jemi mësuar me Evropën ku jetojmë. Jemi mësuar me mënyrën sesi funksionojnë vendet anëtare. Por ajo që është e pagëlltitshme është festa në Tiranë e atyre që për shkak se janë të dominuar nga urrejtja kanë humbur logjikën.