IL Post: Qeveria përdori fondin e emergjencave për të shpëtuar koncertin e Kanye West

Në Shqipëri ka shpërthyer një debat i fortë rreth koncertit të reperit amerikan Kanye West, i planifikuar të mbahet të shtunën, më 11 korrik, në Tiranë.

Koncerti është mbështetur nga qeveria e kryeministrit Edi Rama, i cili në muajin prill e prezantoi si një aktivitet që do të tërhiqte mijëra turistë të huaj. Sipas raportimeve, pritet të marrin pjesë edhe shumë fansa italianë, pas anulimit të koncertit që ishte planifikuar në Reggio Emilia.

Fillimisht ishte parashikuar që aktiviteti të vetëfinancohej përmes shitjes së biletave. Megjithatë, sipas medias italiane, shitjet rezultuan shumë më të ulëta se pritshmëritë dhe një sërë problemesh organizative detyruan qeverinë shqiptare të përdorte mbi 4 milionë euro nga fondi shtetëror i emergjencave, fond që zakonisht përdoret për përballimin e fatkeqësive natyrore dhe situatave të jashtëzakonshme, për të mbuluar kostot e koncertit.

Sipas artikullit, Edi Rama është përballur me kritika për dy arsye kryesore. E para lidhet me faktin se ftoi një artist, të cilit i është ndaluar të performojë në disa vende europiane për shkak të deklaratave të tij antisemite dhe pro-naziste. Arsyeja e dytë lidhet me protestat antiqeveritare që prej afro dy muajsh zhvillohen në Shqipëri, të cilat nisën kundër ndërtimit të një resorti luksoz në një zonë të mbrojtur, projekt i lidhur me kompaninë e Jared Kushner, dhëndrit të presidentit amerikan Donald Trump, dhe i miratuar nga qeveria me synimin për të tërhequr turistë të pasur.

Për protestuesit, koncerti i Kanye West është një tjetër shembull i mënyrës se si, sipas tyre, qeveria shpenzon para publike, përfshirë fondet e destinuara për emergjencat kombëtare, në projekte që nuk sjellin përfitime afatgjata për qytetarët e një prej vendeve më të varfra të Europës.

Në ditët e fundit, Rama ka hedhur poshtë kritikat, duke akuzuar kundërshtarët se po pengojnë strategjinë e tij për zhvillimin ekonomik të Shqipërisë përmes turizmit.

Artikulli ndalet edhe te figura e Kanye West, duke e cilësuar si një nga reperët më të famshëm të dy dekadave të fundit, por thekson se prej vitesh reputacioni dhe karriera e tij janë dëmtuar nga sjelljet e tij të diskutueshme, si edhe nga deklaratat raciste dhe antisemite. Mes tyre përmendet edhe publikimi i këngës “Heil Hitler”. Më pas, artisti ka kërkuar falje për disa nga deklaratat e tij, duke ia atribuar sjelljen çrregullimit bipolar. Megjithatë, ndonëse është margjinalizuar në industrinë e argëtimit, ai vazhdon të gëzojë mbështetje të madhe, veçanërisht nga publiku i ri.

Sipas medias italiane, gjatë dy viteve të fundit vende si Mbretëria e Bashkuar, Franca, Zvicra, Polonia dhe Australia kanë anuluar koncertet e tij ose i kanë refuzuar vizën. Edhe në Itali u anulua koncerti i planifikuar në Reggio Emilia, zyrtarisht për shkak të qëndrimeve të artistit, por edhe për probleme organizative dhe sigurie.

Në artikull thuhet se disa vende, si Holanda në fillim të muajit qershor, i kanë lejuar koncertet e Kanye West pavarësisht polemikave, por se asnjë qeveri europiane nuk ishte angazhuar në mënyrë kaq aktive sa qeveria shqiptare për të mundësuar organizimin e një koncerti të tij.

Rama e ka justifikuar ndërhyrjen financiare të shtetit duke deklaruar se koncerti rrezikonte të anulohej dhe se mbështetja e qeverisë ishte e nevojshme “për të mos vënë Shqipërinë në siklet”. Ai ka pretenduar se eventi pritet të sjellë rreth 25 mijë vizitorë të huaj dhe se ndikimi ekonomik mund të arrijë në rreth 100 milionë euro për ekonominë shqiptare.

Megjithatë, kjo shifër është cilësuar jorealiste edhe nga ish-zëvendësministrja e Ekonomisë në qeverinë e parë Rama, Irena Beqiraj, e cila sot është kritike ndaj mënyrës së menaxhimit të financave publike.

Ndërkohë, nuk janë bërë publike të dhënat zyrtare mbi numrin e biletave të shitura, por sipas raportimit ekzistojnë dyshime të forta se ato kanë qenë shumë më pak se objektivi prej 60 mijë biletash.

Gjithashtu, ditët e fundit disa figura publike kanë shpërndarë njoftime të organizatorëve që ofronin një biletë falas për çdo katër bileta të blera, ndërsa media lokale “Lapsi” ka raportuar se në Tiranë janë shpërndarë edhe bileta falas.

 
Në njoftimin e tij, kryeministri Rama nuk komentoi deklaratat e diskutueshme të Kanye West, por u shpreh në mënyrë të përgjithshme se disa persona kishin hezituar të blinin bileta nga frika se koncerti mund të anulohej./IL Post