Marrëveshja 302 mln euro me SHBA/ Opozita: “Po” marrëveshjes, por “Jo” miratimit brenda ditës

Tre grupet parlamentare të opozitës, PD, Partia e Lirisë dhe Aleanca për Ndryshim, kanë dalë me një deklaratë të përbashkët për marrëveshjen e huasë prej 302 milionë eurosh që Shqipëria pritet të marrë nga Shtetet e Bashkuara për financimin e pajisjeve ushtarake, e cila u miratua me procedurë të përshpejtuar në Kuvend.

Opozita deklaron se e mbështet marrëveshjen në parim dhe e konsideron të nevojshme rritjen e investimeve në mbrojtje dhe përmbushjen e detyrimeve ndaj NATO-s, por jo mënyrën se si mazhoranca kërkon ta miratojë marrëveshjen, përmes një procedure të përshpejtuar brenda ditës.

Në deklaratë, opozita akuzon kryeministrin Edi Rama se po përdor marrëdhëniet me SHBA-në për të justifikuar, sipas saj, shkeljen e procedurave kushtetuese dhe kërkon që marrëveshja t’u vihet në dispozicion deputetëve për shqyrtim.

Sipas opozitës, marrëveshja është miratuar në parim nga qeveria më 19 qershor 2026, duke pasur rreth pesë javë kohë për t’ia përcjellë Kuvendit për ratifikim. Për këtë arsye, grupet opozitare argumentojnë se nuk ekziston një urgjencë që justifikon miratimin e saj brenda ditës.

Deklarata për shtyp: 

PO marrëveshjes me SHBA!

JO mënyrës antikushtetuese se si Edi Rama kërkon ta miratojë brenda ditës në Parlament!

Ky është qëndrimi i opozitës në Kuvendin e Shqipërisë, për marrëveshjen e huasë prej 302 milionë eurosh që Shqipëria merr nga SHBA për financimin e blerjes së pajisjeve ushtarake.

Shqipëria ka nevojë të rrisë investimet në mbrojtje dhe të përmbushë detyrimet ndaj NATO-s, por, siç bën me çdo gjë që ka lidhje me SHBA, Edi Rama po bën pis edhe këtë marrëveshje, duke kërkuar që Kuvendi të shkelë Kushtetutën për të mbuluar dështimet e qeverisë së tij.

Çdo marrëveshje strategjike me aleatin tonë më të rëndësishëm meriton transparencë, debat dhe respektim të Kushtetutës, jo procedura të improvizuara antidemokratike, si ato që qeveria po imponon me dhunën e kartonit dhe që e kthejnë Kuvendin në noter të qeverisë.

Kjo nuk është urgjencë as e Shqipërisë, as e SHBA-së. Është urgjencë e një qeverie që për vite zgjodhi korrupsionin në vend të përmbushjes së detyrimeve ndaj Aleancës dhe sot kërkon të mbulojë dështimet e veta duke shkelur Kushtetutën.

Partia Demokratike e anëtarësoi Shqipërinë në NATO. Ne e pranojmë këtë marrëveshje në parim, por nuk do të pranojmë kurrë që marrëdhëniet strategjike me Shtetet e Bashkuara të përdoren si justifikim për të shkelur Kushtetutën.

Aleanca me SHBA forcohet duke respektuar ligjin, jo duke e shkelur atë. Ne na duhet standardi i anëtarëve të Kongresit amerikan, jo standardi i Taulant Ballës dhe Edi Ramës.

Me qëllim që të zbatohet Kushtetuta, kemi propozuar që sot sëbashku të miratojmë shqyrtimin me procedurë të përshpejtuar, të marrim marrëveshjen për ta shqyrtuar duke garantuat mospublikimin, dhe kemi propozuar që miratimi të bëhet të premten, ku grupet tona parlamentare garantuan prezencën e tyre dhe voton pro marrëveshjes. Kryetari i Kuvendit ra në parim dakord dhe më pas kjo u pengua nga Edi Rama. 

Por Edi Rama e ka zeruar Kushtetutën dhe Parlamentin. Qëllimi i tij është të poshtëroje institucionet e vendit. Është fakt që Qeveria e ka miratuar marrëveshjen në parim në datën 19 Qershor 2026 dhe ka patur 5 javë kohë për ta sjell për ratifikim në Kuvend. 

Ne i qëndrojmë propozimit tonë konstruktiv që deputetëve tu jepet mundësia të njihen me marrëveshjen dhe miratimi i saj të bëhet në një seancë plenare të posaçme ditën e premte të kësaj jave.