Çështja e detit në Hagë, Myslim Pashaj për Politiko: Vendim politik, Haga kërkon argumente shkencore, por s’kam besim te ekipi negociator

Myslim Pashaj, koloneli që kundërshtoi i pari marrëveshjen Shqipëri-Greqi për ndarjen e detit në vitin 2009 e ka cilësuar politik vendimin e Shqipërisë dhe Greqisë për t’iu dretuar drejtësisë ndërkombëtare për të zgjidhur debatin mbi delimitimin e hapësirës detare ndërmjet dy shteteve fqinje.

Në një prononcim për Politiko.al, Pashaj shprehet skeptik sa i takon zgjidhjes së pritshme pasi sipas tij Haga kërkon argumente shkencore teknike dhe juridike, por nga ana tjetër thotë se s'ka besim te aftësitë e treguara deri tani nga ana e grupit negociator.

“Vendimi mesa kuptohet është politik i të dy shteteve i konfirmuar sot me Dendias në Tiranë.

Ajo që është bërë deri tash si negociatë shmanget në pasukses. Ne nuk e dimë se ç’ka ndodhur në ato negociata, por rezultati ka shkuar në prehër të qeverive dhe ato bënë një parapakt midis tyre. Mendimet tona ngelen subjektive, pro dhe kundër, por vendimi është politik.

Mendimi im është se duhej lënë edhe një kujdesi për negociata, sepse ne jemi fqinj dhe duhet të shmangim mospajtimin me argumente. Nëse nuk mund të arrihej atëherë duhet t'i drejtohemi Hagës. Nuk kam besim tek aftësitë e gjersotme të grupit negociator.

Sikur të ndodhë që edhe grupi i punës që do të hartoje "disputes" (mosakordimet për kalim në gjykim ndërkombëtar), ne do të kemi te njëjtin rezultat ku mund të humbim.

Kujtoni grupin e parë negociator, se si e lëshoi Otranton dhe Kanalin e Korfuzit, me një lehtësi të paimagjinueshme. Dhe gjykata Kushtetuese e hodhi poshtë. Kujtoni grupin e dytë negociator se si nuk ra dakord për një draft marrëveshje dhe nuk firmosen të gjithë!

Haga kërkon argumente shkencore teknike dhe juridik, kërkon lobim dhe konsulta të epërme me specialistë.

E së dyti nuk kam besim se do te fitojmë gjirin e Sarandës, si një e drejtë historike. Kjo nyje duhej bërë gati nga një grup i veçante, në pretendimet që ka Shqipëria për gjirin e saj, për të mos e ndarë”, shprehet Pashaj për Politiko.al.

Kujtojmë se kundërshtitë mes palëve duket se janë shfaqur kur nisën negociatat për një marrëveshje lidhur me ndarjen e hapësirave detare në Detin Jon, në vitin 2018, që u pezulluan në verën e 2019-ës. 

Zgjedhjet e parakohshme parlamentare në Greqi, të humbura nga ish-kryeministri Cipras dhe të fituara nga kryeministri aktual Mitsotakis, në korrik 2019  e zhvendosën Marrëveshjen e Detit me Shqipërinë nga prioritetet e Greqisë, në vitin e parë të mandatit qeverisës Mitsotakis. 

Në vitin 2009 Gjykata Kushtetuese hodhi poshtë Marrëveshjen e Detit mes Shqipërisë dhe Greqisë, të arritur në kohën, kur në pushtet ishte opozita e sotme jashtë parlamentare.

Me votë unanime gjykata e  konsideroi si marrëveshje "antikushtetuese, të karakterizuar nga moszbatimi i parimeve bazë të së drejtës ndërkombëtare për ndarjen e hapësirave detare midis dy vendeve dhe arritjen e një rezultati të drejtë dhe të ndershëm". 

S.F