Përmbytjet nga moti i keq, reagon Ministria e Mbrojtjes: Vijon situatë problematike në disa zona

Pas reshjeve intensive të shiut që kanë përfshirë vendin gjatë orëve të fundit, Ministria e Mbrojtjes ka publikuar një përditësim të detajuar mbi gjendjen në qarqet e Shqipërisë.

SIpas njoftimit, pjesa më e madhe e territorit paraqitet e qetë dhe e stabilizuar, ndërsa problematika të lokalizuara vijojnë të trajtohen në Dibër, Durrës, Lezhë, Kukës dhe në pak zona të Korçës. Në vijim, paraqitet një përmbledhje e situatës sipas qarqeve.

Njoftimi nga ministria: 

Diber

Mungesë energjie elektrike në njësitë administrative Kala e Dodës, Sllovë, Zall-Dardhë, Reç, Lurë dhe pjesërisht në Arras e Fushë-Çidhën. Ekipe të OSHEE-së janë në terren për riparimin e defekteve. Intensiteti i reshjeve ka rënë ndjeshëm.

Durrës

Në Bashkinë Sukth janë përmbytur disa banesa në fshatrat Kullë, Hamallë dhe Rrushkull, si dhe disa rrugë lokale mbeten të bllokuara. Në Manzë raportohen rreth 48 shtëpi me ujë brenda. Në Bashkinë Krujë po punohet për hapjen e kanaleve kulluese në Thumanë, Borizanë dhe Mazhë. Në lumin e Drojës po forcohet argjinatura për të parandaluar përmbytje të mëtejshme. Niveli i ujit ka filluar të bjerë.

Lezhë

Në Bashkinë Kurbin vijon ndërhyrja në Mamurras, ku rreth 50 banesa kanë prani uji, dhe në Milot ku raportohen 12 shtëpi të përmbytura. Në terren janë strukturat e bashkisë dhe mjetet e Ujësjellës-Kanalizimeve. Në Mirditë ka ndërprerje të energjisë në disa fshatra të njësisë Rubik. Lumenjtë Drin dhe Mat janë brenda kuotave normale.

Kukës

Rënie inertesh në disa akse rrugore; kompanitë kontraktore po pastrojnë rrugët. Në zonat malore të thella vijon mungesa e energjisë, por ekipet e OSHEE-së po punojnë për rikthimin e furnizimit.

Shkodër

Nuk raportohen problematika të mëdha. Vijojnë punimet parandaluese në kanalin e Gurit të Zi, te ura e Dajçit dhe në “Harkun e Berdicës” për të garantuar rrjedhjen normale të ujërave.

Qarqet e tjera Gjirokastër, Vlorë, Fier, Elbasan, Berat dhe Tiranë nuk paraqesin probleme nga reshjet. Në Korçë po punohet për rikthimin e energjisë elektrike në disa njësi administrative.