Rrëfimi i Jamarbër Malltezit pa filtra në 'Pasvon': Argita më sfidoi, Berisha më befasoi!

Jamarbër Malltezi, anëtar i Këshillit Kombëtar dhe i Kryesisë së Partisë Demokratike ka ndarë detaje të panjohura nga rinia e tij, marrëdhënia me kryedemokratin Sali Berisha, si dhe njohjen me të bijën, Argitën.

Gjatë një interviste në podcastin “Pasvon” të Alfred Lelës, Malltezi e nisi rrëfimin duke kujtuar herën e parë kur dëgjoi emrin e Berishës, ende gjimnazist, përmes një historie që i kishte treguar i ati. Sipas tij, Berisha njihej që në kohën e studimeve për përgatitjen dhe vendosmërinë e tij të jashtëzakonshme.

“Babai më tha se ishte një student që sfidonte profesorët dhe u kërkonte të ballafaqoheshin me njohuritë e tij. Aty e dëgjova për herë të parë emrin e Sali Berishës”, tregoi Malltezi.

Më vonë ai e pa nga afër gjatë lëvizjes studentore të Dhjetorit 1990, ku Berisha, sipas tij, spikaste për energjinë dhe mënyrën se si komunikonte me studentët.

Një pjesë e rëndësishme e intervistës iu kushtua edhe njohjes me Argita Berishën. Malltezi zbuloi se të dy kishin qenë bashkëmoshatarë dhe më pas studentë në të njëjtin kurs në Fakultetin e Shkencave të Natyrës.

“Ne ishim rebelë për kohën. Nuk pranonim kornizat komuniste dhe bënim shpesh batuta kundër regjimit”, kujtoi ai.

Sipas Malltezit, afrimi mes tyre u forcua gjatë lëvizjes studentore dhe veçanërisht në grevën e urisë të vitit 1991. Ai tregoi se fillimisht kishte vendosur të hynte vetë në grevë, ndërsa Argita kishte shprehur dyshime nëse ai do ta mbante vendimin.

“Unë i thashë se do të hyja në grevë dhe ajo më tha se nuk isha nga ata që hynin në grevë urie. I thashë hajde vëmë bast dhe hyra. Më pas hyri edhe ajo”, rrëfeu Malltezi.

Ai kujtoi gjithashtu momentet e vështira të asaj greve, duke treguar me humor se ditën e parë konsumuan të gjitha galetat që kishin marrë me vete dhe më pas mbetën pa asgjë.

"E bukura është që para se të hyja unë pata blerë ca galeta bashkë me një mikun tim. Kishim nja pesë galeta gjithsej. Ditën e parë i hëngrëm që të gjitha, dhe pastaj s'kishim asgjë! Zero", kujton Malltezi. 

Sekretet për Berishën

Duke folur për Sali Berishën, Malltezi tha se tipari që e ka impresionuar më shumë ndër vite është vetëdisiplina e tij.

Ai solli si shembull një drekë familjare, ku Berisha, megjithëse i pëlqyen shumë qershitë e servirura, ndaloi veten pas disa kokrrash për shkak të përmbajtjes së sheqerit.

Sipas tij, ish-kryeministri ruan të njëjtën disiplinë edhe në rutinën e përditshme, duke shmangur përdorimin e ashensorit dhe duke zgjedhur gjithmonë shkallët, pavarësisht moshës apo angazhimeve.

"Na kishte sjellë një mik disa qershi të mrekullueshme. Unë u futa, hëngra 30 kokrra. Berisha mori pesë, pastaj mori një të gjashtë. Ngaqë i pëlqyen shumë tha 'Stop, nuk mund të marr më tepër se kanë sheqer.' Të vetëpërmbahesh kur ke ato përpara, tregon vullnet të hekurt. Ose hurma Arabie. Mund të marrë një hurmë, dhe tjetrën e lë për nesër. Kjo vetëdisiplinë shtrihet në të gjithë hapat e jetës së tij. Asnjëherë nuk përdor ashensorin, në çdo zyrë apo institucion bën vetëm shkallët, çdo ditë", shtoi Malltezi. 

Ndiq intervistën e plotë: