‘1 mln lekë për të futur një celular në burg’, Beci: Kontrolle ‘blic’ për t'i sekuestruar

Implementimi i regjimit të ashpër "41 bis" në Shqipëri duket se nuk ka arritur të ndalojë aktivitetin kriminal brenda qelive.

I ftuar në ‘Kafe Shqeto’ në Syri Tv nën moderimin e Flavio Qarrit, ish prokurori Eugen Beci shprehet se edhe pse qëllimi kryesor i këtij izolimi është shkëputja e personave me rrezikshmëri të lartë nga bashkëpunëtorët e tyre jashtë, realiteti tregon një tablo krejt tjetër të sistemit penitenciar në vend.

Sipas tij, të dënuarit jo vetëm që vazhdojnë të komunikojnë pa pengesa me botën e jashtme, por organizojnë trafiqe ndërkombëtare droge dhe japin porosi për vrasje e plagosje direkt nga dhomat e burgut.

Beci shton se siguria në burgje ka degraduar deri në atë pikë sa organizohen festa, mbledhje, një kaos i vërtetë, që sipas tij e kthejnë infrastrukturën e vuajtjes së dënimit në një "Dubai" të dytë për kriminelët.

Por futja e sendeve të ndaluara është kthyer në një biznes fitimprurës, shton ndër të tjera ish prokurori, duke folur me shifra për futjen e një aparati celular brenda burgut.

Skema korruptive thellohet kur punonjësit, për të gjeneruar të ardhura të reja, zhvillojnë kontrolle "blic" për të sekuestruar telefonat, me qëllimin e vetëm për t'i rishtur ata sërish tek të burgosurit për të njëjtën vlerë.

Duke kopjuar atë praktikën po themi më të mirë italiane duke e quajtur 41 bis, po është një izolim i tejkaluar tashmë. Nuk e dimë se çfarë rezultatesh konkrete ka dhënë, por që të jemi më të saktë, ky lloj regjimi duke patur në konsideratë faktin që ka dy qëllime kryesore: të izolojë personin që të mos krijojë probleme në sistemin penitenciar, dhe e dyta dhe më kryesorja është që ta izolojë personin nga tërë veprimtaria e tij kriminale e cila mund të zhvillohet dhe brenda burgut. Pjesa e parë mbase, e shohim që nuk është realizuar. Pjesa e parë e ruajtjes së rendit dhe sigurisë në tërë sistemin e burgjeve në Shqipëri. Dalin video, dalin problematika, dalin situata nga më të ndryshmet.

Ndërsa për pjesën e dytë nuk di të them, por ka patur shumë raste kur ne kemi krijuar hetime të plota proaktive nga persona që ishin brenda burgut, komunikonin, zhvillonin aktivitetin e tyre kriminal, madje bënin dhe trafik droge nga burgu, për të mos thënë porositë që japin për vrasje, plagosje, të cilat janë kthyer në normalitet nga porositë që vijnë nga burgu, por mbi të gjitha ata e kishin sistemin e infrastrukturës aq të mirë në burg, sa mund të drejtonin pa merak, pa problem një trafik droge ndërkombëtar. Siç e bëjnë çunat në Dubai, e bëjnë çunat në burg sot, këtë situatë.

Prandaj, duke patur në konsideratë qëllimin që ka izolimi i personave, duhet të shohim a është realizuar ky qëllim apo jo? Apo ka mbetur thjesht si një lloj ndëshkimi, si një lloj hakmarrje. E vërteta është që ligji duhet të mos jetë hakmarrës, ligji duhet të jetë proporcional në zbatim të lirive dhe të drejtave të njeriut, por duke realizuar qëllimin e vërtetë të tij. Ta izolosh personin, dhe izolimi është maksimal në rast se futesh në një regjim të tillë të posaçëm. Ngrihet një komision i cili vlerëson rrezikshmërinë shoqërore, faktin që personi mund të zhvillojë akoma aktivitet kriminal dhe ajo që thashë, ruajtjen e rendit dhe sigurisë brenda sistemit të burgjev.

Sepse kemi parë kohët e fundit, kemi parë kohët e fundit që persona të rrezikshëm jo vetëm që mund të vazhdojnë veprimtarinë kriminale jashtë nëpërmjet telefonave, por krijojnë një kaos brenda burgut. Krijojnë një kaos brenda burgut, bëjnë party, bëjnë mbledhje, bëjnë konsultime dhe të gjitha këto elementë duket se e shkatërrojnë regjimin e burgjeve. Dhe po të vini re, në çdo kontroll që është bërë herë pas here në sistemin e burgjeve, në burgun e sigurisë së lartë apo dhe në burgjet e sigurisë së zakonshme, gjithmonë ka probleme. Gjithmonë gjenden telefona.

Gjithmonë gjenden telefona dhe e çuditshmja është se sa herë ndërrohen administratat e burgjeve, aq herë bëhen kontrolle dhe aq herë gjenden sende të kundërligjshme. Kjo do të thotë që duket sikur sistemi i burgjeve nuk ka nevojë për kontrolle blic, ka nevojë për një infrastrukturë, për një strukturë të ngritur e cila patjetër duhet të luftojë së pari korrupsionin brenda burgjeve, sepse e dimë shumë mirë që kontrollet bëhen sikur merren këto telefona dhe të futen telefona të tjerë dhe të riqarkullojë paraja, të ketë korrupsion të mëtejshëm. Domethënë në rast se ti fut një telefon me 1 milion lekë të vjetra, kalon një muaj, dy muaj, administratës së burgjeve i duhen lekë, i fusin një kontroll, i marrin telefonin dhe i do fusi telefonin prapë. Dhe ja u morën dhe 1 milion lekë të tjera. Kaq e thjeshtë duket sikur bëhet situata.

Nuk ka logjikë në rast se ti bën kontrolle të forta, bën kontrolle jo sporadike, po jo të papritura, por bën kontrolle të cilat janë të vazhdueshme... përpos kësaj rregullon sistemin brenda, rregullon çdo element të sigurisë, mund të të ketë dalë situata nga kontrolli në një moment, mund të kesh burgun e Peqinit me festa, mund të kesh burgun e Reçit me, me situata eskortash të paparashikuara, por ti kur ndërhyn, ndërhyn në mënyrë masive, krijon një kontroll dhe pastaj merr masat që mos shkosh pas tre muajsh prapë të gjesh të njëjtën situatë. Po merr masat, e zeron situatën dhe pastaj vazhdon me rendin dhe sigurinë brenda burgjeve.

Një menaxhim normal. Dhe menaxhimi normal ka të bëjë me luftë kundër korrupsionit brenda burgjeve, me trajtimin më të mirë të gardianëve po themi, brenda burgjeve, trajtim financiar, trajtim sa më dinjitoz dhe për ta, sepse burgun e bëjnë bashkë me të burgosurit dhe ata. Dhe sigurisht që duke vajtur në fund fare pastaj, në rast se kemi tërë shoqërinë, në rast se kemi punonjës të policisë së shtetit të korruptuar, në rast se kemi prokurorë dhe gjyqtarë të korruptuar, në rast se kemi ekzekutiv të korruptuar, tani pse çuditemi që kemi dhe gardianë të korruptuar.