Flash News

Krimi elektoral në Belsh, Prokuroria e Elbasanit 4 punonjës të IMT pas kallëzimit të PD

Incident në Giro d’Italia, qytetari përplaset nga çiklisti

PD kundër kërkesës së PS për shtyrjen e orarit të votimit në Vlorë: Abuzim me procesin zgjedhor

I kërkuar në Shqipëri për vrasje, arrestohet në Greqi Ardian Ahmetaj, shoku i Laert Haxhiut

Dita e dytë e “Giro d’Italia 2025”, rrugët që do bllokohen në Tiranë

KRYESORE

Ditët e Kujtesës, promovohen botimet e reja shkencore mbi diktaturën komuniste

Politiko 26 Tetor 2018, 19:58

Gjatë ditës së pestë të edicionit të tretë të “Ditëve të Kujtesës”, u promovuan vëllimet e reja të botimeve shkencore mbi diktaturën. Nën kujdesin e Institutit për Demokraci Media dhe Kulturë (IDMC) dhe bashkëpunimit me Fondacionin Konrad Adenauer (KAS), u prezantuan për publikun vëllimi i dytë i projektit të IDMC “Komunizmi përmes dokumenteve arkivore”, vëllimi i shtatë i “Fjalorit enciklopedik të viktimave të terrorit komunist” dhe vëllimi i parë i “Indoktrinimit komunist”, botime të Institutit të Studimit të Krimeve dhe Pasojave të Komunizmit (ISKK) dhe Akademisë së Studimeve Albanologjike (ASA).

Në lidhje me botimim e dytë “Komunizmi përmes dokumenteve arkivore”, Drejtoresha e IDMC, Jonila Godole tha se Instituti që ajo drejton e ka menduar të rëndësishëm botimin e një libri që përmban materiale plotësuese për lëndën e Historisë në gjimnaze, sepse “ka ardhur koha që historia të mos mësohet nga thashathemet, por përmes të dhënave arkivore”.

Më tej botimin e përshkroi me detaje ekspertja e kurrikulës në shkolla, Fatmiroshe Xhemalaj. Ajo tha se vëllimi i dytë, ndryshe nga vëllimi i parë që flet për “Represionin në periudhën e vetizolimit”, ndalet te “Jeta e përditshme në periudhën e vetizolimit”.

Në pjesën e dytë u prezantua vëllimi i shtatë i “Fjalorit enciklopedik të viktimave të terrorit komunist (Q-S)” punuar nga ISKK dhe po kështu edhe vëllimi i parë i “Indoktrinimit komunist përmes kulturës, letërsisë dhe artit (1945-1968)” punuar nga Akademia e Studimeve Albanologjike.

Vëllimin e radhës së enciklopedisë e prezantoi Çelo Hoxha, Drejtor i Drejtorisë së Arkivës në ISKK. Ai rikujtoi se punimi ka mjaft vlera për studiuesit dhe sidomos familjet e të përndjekurve. Çelo tha se enciklopedia e viktimave shërben njëlloj si kodikët e shumëpërfolur, pasi edhe në të ardhmen, kur të ketë kaluar kohë, emrat e atyre që vuajtën diktaturën do të mbetet.

Ndërkohë prezantimin për botimin tjetër e bëri historiani Beqir Meta, i cili ishte njëherësh edhe një nga autorët e librit “Indoktrinimit komunist përmes kulturës, letërsisë dhe artit (1945-1968)”. Vëllimi i parë sipas tij nuk mund të përfshinte të gjitha aspektet dhe masën e përgjithshme të indoktrinimit komunist, prandaj u vendos që të specifikohej për kulturën letërsinë dhe artin.

I pranishëm në aktivitet, Drejtori i KAS për Shqipërinë, Ëalter Glos premtoi mbështetje të mëtejshme të projekteve që synojnë zbardhjen, dokumentimin dhe ruajtjen e historisë së vuajtjeve njerëzore të diktaturës.

“Ditët e Kujtesës” vazhdojnë më tej ditën e hënë, datë 29 me prezantimin punimeve të studiuesve të rinj, konferencën ndërkombëtare shkencore që do të mbahet për dy ditë me rradhë, dhe më tej me konkursin “Pyet Gjyshërit 3”.