Amerika, nga Joseph Kennedy te Tom Doshy

Alfred Lela

Tom Doshi dhe Altina Xhoxhaj nuk ngjajnë me njëri-tjetrën. I pari është një biznesmen kontroversial, i futur në politikë nëpërmjet libertinazhit ‘asgjë nuk është e palejuar’ të Fatos Nanos, dhe i mbetur aty si përllogaritje pragmatike e Edi Ramës.

Profili i tij, diku mes guximtarit në biznes dhe rishtarit në politikë, megjithatë, është bërë dominues në dekadën e fundit. Ai përfaqëson oreksin e disa biznesmenëve shqiptarë për të kaluar nëpër rrugët e Joseph Kennedy-t, të atit të presidentit amerikan, JFK, i cili nga kontrabandist pijesh i kohës së Prohibicionit u bë Ambasador i ShBA-ve në Angli dhe patriarku i një prej familjeve më të fuqishme të Amerikës.

Paradoksalisht, në rrugë e sipër për te legjitimiteti politik, Tom Doshi është ndeshur me amerikanët. Jo të njëjtët, por pasardhësit e asaj trashëgimie politike e shoqërore që ka prodhuar Joseph Kennedy-n dhe legjitimitetin e tij politik. Por, kjo nuk ka rëndësi, sepse nuk jemi më në epokën e Peaky Blinders, apo jo?

Altina Xhoxhaj, ish-gjykatëse e lartë e Republikës, kërkon gjithashtu legjitimimin e vetes dhe ish-sistemit nëpërmjet deligjitimimit të një sistemi të ri, ngritur si kombinim i vullnetit ndërkombëtar dhe nevojave politike. Ajo pat paraqitur një ankesë në Strasburg, në Gjykatën Europiane të të drejtave të Njeriut, por u rrëzua.

Të dy, Doshi dhe Xhoxhaj, janë me një këmbë në të shkuarën dhe me një dorë që kacavirret në rrënjët e një sistemi të ri që rreket të ngrihet ndërkohë në Shqipëri. Statusi dhe paratë nuk u mjaftojnë për ta blerë shndërrimin. Ata kanë mësuar se sistemet që i prodhuan nuk janë të përjetshme.

Si në këngën e Bob Dylan-it “mund të jetë Zoti a dreqi, por të duhet t’i shërbesh dikujt”.

Në këtë rast, shërbimet e së shkuarës kthehen për të penguar ato të së ardhmes.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm