Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

'Letra' e Llallës: një turp shqiptar në Anglishte të keqe

Politiko 12 Prill 2018, 16:10

Alfred Lela

Saktësimi i parë, që nuk ka vlerë materiale, por shpreh cilësinë e autorit, është se, në fakt, nuk bëhet fjalë për një letër, por një raportim (një lloj letre poshtë derës), dorëzuar Kryetarit të Nënkomitetit të Europës, Euroazisë dhe Kërcënimeve të Reja në Kongresin Amerikan, Dana Rohrabacher:

Raporti i z. Llalla është dorëzuar në një seancë dëgjimore që mbante ky n/Komitet për çështje që lidheshin me Ballkanin, si rasti i dhunës së ushtruar në parlamentin maqedonas apo Kosova, dhe ku ishin thirrur si raportues Hoyt Brian Yee, Joe DioGuradi, e të tjerë.

Raporti paraqitet si aneks në një dokument prej 101 faqesh.

Pra, më shumë se komunikim institucional, është një lobim. Fakti që postohet në faqen zyrtare të Kongresit është element transparence amerikane dhe jo rëndësie shqiptare.

Një tjetër element që ndesh, nëse e njeh gjuhën e Amerikës, qoftë në nivel fillestar, është anglishtja e keqe, profane dhe e pafalshme që një prej zyrtarëve më të lartë të shtetit shqiptar i lejon vetes në një përçapje të tillë, pavarësisht faktit a është institucionale ose jo.

18 faqet (e zeza) të ish-Kryeprokurorit të Shqipërisë janë të mbushura me gabime protokollare, gjuhësore, terminologjike dhe etike, që do e bënin të skuqej edhe më të ultin nëpunës të çdo republike normale. Le t'i kërkojmë dorën Konicës dhe të themi se anglishtja e Llallës i ngjan asaj të personazheve të 'Përralla nga Zululandi'. Një Zulullallë është e gjitha.

Më brilanti, në të errëtën e vet gabimore, është referimi që ish-shefi i akuzës i bën gruas së vet: "Lady" (në vend të 'spouse' ose 'wife'). Në shumë raste struktura është e shqipes dhe fjalët të anglishtes, por hej, çfarë bëri mirë Adriatiku që të shkruante me sqimë, mu këtej nga brigjet e Ilirisë. Letra, afërmendsh, flet shumë për të dhe për institucionin e Prokurorisë së Përgjithshme, e cila qëlloka e pazonja të prodhojë një anglishtfolës të mirë, apo qoftë edhe të ketë ftohtësinë e mendjes që ta kërkojë një të tillë jashtë mureve 'sekrete' të vetes:

Anglishtja, pavarësisht, sikletosjes, është më e pakta 'bezdi kombëtare' që duhet të shkaktojë raporti i Kryeprokurorit të Shqipërisë. Aty mund ta kapësh gafil z. Llalla duke dëshmuar dështimin e vet personal si shef akuze dhe atë të institucionit që dikur drejtonte. Raporti është më shumë një qurravitje ankimtare se sa një vlerësim i punës së Prokurorisë së Përgjithshme; më shumë një fletërrufe se një thirrje dinjitoze për ndihmë drejtuar Kongresit Amerikan, një institucion që prodhon diellin dhe rrufetë në qiellin gjeopolitik të botës; më shumë një spiunim se sa një J'accuse e llojit të (ndjesë për teprimin!) Emil Zolasë.

I gjithë ai tekst tregon për mjerimin e të gjithë superstrukturës shtetërore që kuturiset në mjegullën e paaftësisë, autoritarizmit, kleptokracisë, injorancës, dhe shkon e gjen njerëz si Llalla me shumë shokë, dhe i fut në zyrat e larta të Republikës. Flet edhe për mjerimin e fabrikës sociale që i prodhon, dhe më pas i pranon, dhe që jemi vetë ne shqiptarët, pa dallim feje, krahine, ideje dhe shkollimi.

Absurdi kulmon me përpjekjet e Llallës për të thirrur në ndihmë të raportitmit të tij ato që mund të konsiderohen 'autoritete'. Kështu, ai sjell një fjali të një 'komentatori publik' (hajde merre vesh se çfarë është një 'komentator publik', por ndoshta e ka për një nga analistët e studiove), të cilin e përdor për të akuzuar Ambasadorin amerikan:

Pak më poshtë ai shkëput një pasazh më të gjatë nga një shkrim/opinion i gazetës 'Financial Times'. E cila, pavarësisht rankimit si 'prestigjioze' nuk mund të dijë, bëjë apo referojë më shumë për problemin e drogës në Shqipëri se sa vetë Kryeprokurori i Shqipërisë. Që është...kush e gjen?...Adriatik Llalla:

La këtu e la atje, për t'u bërë e gjitha bashkë një Adriatik dhalle, raporti në fjalë është përpjekja e Kryeprokurorit për të demontuar dhe diskredituar shefin e Misionit amerikan në Shqipëri, Donald Lu. Politikanëve të opozitës u falet, sepse janë pjesë e një pushteti efemer, jo lëndor, i cili nuk trupëzohet në mekanizma firme, vule dhe vendimesh, por thjesht komunikimi publik. Por, jo Kreut të Prokurorisë së Republikës, i cili mund të vendosë në vështirësi secilin prej shefave politikë të vendit, mund të ngrejë akuza, të hapë hetime, të mbrojë Republikën dhe qytetarët e saj nga droga, kriminaliteti, mujsharia politike, e kështu me radhë.

A ka bërë gjë të tillë Adritik Llalla gjatë pesë viteve të gjatë në krye të Prokurorisë? Nëse jo, faleni, do të ketë qenë i zënë duke u marrë me diskreditimin dhe shkarkimin e Ambasadorit të një vendi të huaj në Tiranë.

Sprovë që nuk i ka ecur, ndoshta bash prej Anglishtes së keqe dhe trashësisë së argumenteve dhe thurjes së tyre në raportin famëkeq. Më keq ende, pikërisht mjerimi i atij raporti mund t'i ketë mjaftuar Rex Tillerson për ta shpallur non grata.