Mashtrimi i ri në WhatsApp, policia apel qytetarëve: Mos jepni kodin 6-shifror

Policia e Shtetit ka ngritur alarmin për një skemë mashtrimi që synon marrjen e kontrollit të llogarive WhatsApp të qytetarëve.

Sipas njoftimit, autorët po përdorin mesazhe dhe linqe të rreme, përmes të cilave u kërkohet përdoruesve të vendosin kodin 6-shifror të verifikimit, duke ua mundësuar mashtruesve regjistrimin e llogarisë në një pajisje tjetër.

Policia apelon  dhe u kërkon qytetarëve të mos ndajnë kodin e verifikimit dhe të aktivizojnë verifikimin me dy hapa siç shihet në udhëzim.

Njoftimi nga policia: 

Policia e Shtetit apelon për kujdes ndaj tentativave për marrjen e aksesit në llogaritë WhatsApp.

Policia e Shtetit informon qytetarët se janë konstatuar raste të qarkullimit të mesazheve dhe lidhjeve (linkeve) mashtruese, të cilat synojnë marrjen e kontrollit të llogarive WhatsApp.

Mashtruesit dërgojnë linke me pretendime të ndryshme, si p.sh. për të votuar në një konkurs ose për të konfirmuar një veprim. Më pas, i kërkohet përdoruesit të vendosë kodin 6-shifror të verifikimit të WhatsApp. Ky kod përdoret nga autorët për të regjistruar llogarinë në një pajisje tjetër dhe për të marrë kontrollin e saj.

Policia e Shtetit këshillon qytetarët:

* Mos klikoni në linke të dyshimta, edhe nëse dërgohen nga persona të njohur;

* Mos ndani kurrë kodin e verifikimit të WhatsApp me askënd;

* Aktivizoni funksionin Tëo-Step Verification (Verifikimi me dy hapa) në aplikacionin WhatsApp;

* Nëse dyshoni se llogaria juaj është komprometuar, veproni menjëherë për ta rikuperuar atë dhe njoftoni personat e kontakteve tuaja.

Mbroni të dhënat tuaja!

Kujdesi juaj është mbrojtja më e mirë ndaj mashtrimeve kibernetike.