Stafi i spitalit universitar “Shefqet Ndroqi” ka reaguar lidhur me rastin e të riut i cili u vetëhodh nga kati i tretë i spitalit, ku dhe gjeti vdekjen e menjëhershme.
Në njoftimin zyrtar, spitali sqaron se 29-vjeçari i cili po trajtohej nga covid-19 ishte në gjendje të stabilizuar, ndërsa sa i takon shkakut, sqaron se janë duke u kryer hetimi nga ana e organeve kompetente.
“Stafi i spitalit universitar “Shefqet Ndroqi” shpreh dhimbjen për humbjen e jetës së 29-vjeçarit me inicialet Xh. K. i cili i dha fund jetës mëngjesin e sotëm, dhe i shpreh ngushëllimet më të sinqerta familjes së tij.
I riu i konfirmuar me COVID-19, po trajtohej prej 4 ditësh në spitalin “Shefqet Ndroqi”, me terapinë e plotë të mjekimit dhe gjendja e tij ishte e stabilizuar.
Lidhur me arsyet që e çuan të riun drejt këtij akti ekstrem, është duke u kryer hetimi nga ana e organeve kompetente.
Stafi i spitalit universitar “Shefqet Ndroqi” siguron qytetarët se do të vazhdojë të ofrojë me përkushtim dhe profesionalizëm, shërbim shëndetësor për pacientët që trajtohen në spitalin tonë”, njofton spitali.
Financuar Nga Bashkimi Europian
