A do ta përjashtojë Rama-Spiropalin? Fati i ‘disidentëve’ në PS dhe modeli i ndëshkimit brenda partisë

Përplasja e hapur tashmë mes kryeministrit Edi Rama dhe Elisa Spiropalit, pas shkarkimit si ministre e Jashtme është shoqëruar me paralajmërime të drejtpërdrejta për përjashtim.

Ky fakt, i konfirmuar sot nga vetë Spiropali, ka rikthyer në vëmendje një pyetje të përsëritur. Çfarë ndodh me figurat që sfidojnë linjën e kryeministrit brenda Partisë Socialiste?

Me deklaratën e saj “Më përjashto” dhe reagimet e saj kritike ndaj modelit të qeverisjes së PS-së, duket se e ka pozicionuar vetwn në një vijë të gjatë përplasjesh brenda mazhorancës, ku figura të rëndësishme kanë pasur fat politik të ndryshëm pas divergjencave me kryeministrin.

Duke iu referuar disa rasteve konkrete, disa figura të rëndësishme të PS kanë kaluar përmes përplasjeve me kryeministrin, me funde të ndryshme politike.

Ben Blushi

Një nga rastet më të hershme të kritikës së brendshme të fortë. Pasi doli hapur kundër drejtimit të Ramës dhe modelit të qeverisjes, ai u largua nga PS dhe themeloi një forcë të re politike, LIBRA, që nuk arriti të mbijetojë në skenën elektorale.

Saimir Tahiri 

Ish-ministër i Brendshëm dhe një nga figurat më të fuqishme të qeverisë së parë të Ramës, përfundoi i distancuar politikisht dhe më pas i përfshirë në procese gjyqësore, duke u kthyer nga një aset politik në një figurë të diskutueshme.

Arben Ahmetaj 

Dikur një nga njerëzit më të afërt të kryeministrit dhe arkitekt i rëndësishëm i politikës ekonomike, më pas u përball me largim të papritur nga qeveria dhe përplasje të hapura me mazhorancën, duke u zhvendosur në një pozicion kritik ndaj saj.

Aktualisht, Ahmetaj ndodhet në arrati dhe ka denoncuar disa herë skandale të qeverisë Rama. 

Fatmir Xhafaj 

Edhe pse jo në formën e një përplasjeje të drejtpërdrejtë publike, largimi i tij nga ministria e Brendshme në një moment të tensionuar politik u interpretua si një sinjal i qartë i rikonfigurimeve të brendshme të pushtetit.

Erion Veliaj: 

Në disa analiza politike dhe komente mediatike, Erion Veliaj, i cili ndodhet prej një viti e gjysmë në burg, është përmendur herë pas here si një figurë që ka pasur nuanca të ndryshme qëndrimi brenda mazhorancës, megjithëse ai nuk ka artikuluar publikisht një linjë të hapur kundërshtuese ndaj kryeministrit Edi Rama apo drejtimit të Partisë Socialiste.

Në këtë kontekst, deklaratat e fundit të Spiropalit ngrenë pyetjen nëse edhe ajo po hyn në të njëjtën trajektore me figurat e tjera që kanë sfiduar kryeministrin, apo kjo përplasje do të ketë një rezultat ndryshe.
Mbetet për t'u parë nese është ky një sinjal për një çarje të re brenda mazhorancës, apo thjesht një tjetër episod i modelit të ndëshkimit brenda partisë si "disidentët" e mëparshëm. Politiko.al