Mbrëmë në Tiranë është parandaluar nga policia një ngjarje e rëndë kriminale.
Një person kishte planifikuar të kryente një vrasje në rrugën “Bilal Xhaferi”, por ndërhyrja e policisë ka bërë të mundur parandalimin e vrasjes dhe arrestimin e autorit, i cili rezulton të jetë një person i shumëkërkuar, i cilësuar me rrezikshmëri të lartë shoqërore.
Bëhet fjalë për Sadetin Erkoçeviq, 28 vjeç, lindur dhe banues në Shkodër. Ai është shpallur në ‘listën e zezë’ të policisë, mes personave më të kërkuar nga policia në Shkodër.
Në videon e publikuar nga policia, shihet se i riu ishte kamufluar me syze dhe me kapele për të mos u identifikuar, ndërsa para tentativës ai bënte lëvizje të dyshimta.
Pas arrestimit, të riut, i është gjetur në çantën e dorës një armë zjarri pistolete e tipit Bereta, me 14 fishekë dhe një fishek në fole gati për qitje.
Gjykata e Rrethit Gjyqësor Shkodër, me vendim të formës së prerë në datën 15.02.2018, e ka dënuar me 20 vjet burg për veprat penale “Vrasje me dashje” dhe “Prodhim dhe mbajtje pa leje te armeve e municioneve luftarake”.
Më datë 10.05.2014, në një lokal me muzikë live, autori Sadetin Erkoçeviq ka vrarë me armë zjarri pistoletë shtetasin I.Y. dhe ka plagosur një tjetër.
