Në Britani po debatojnë që të sjellin të burgosurit shqiptarë të dënuar në ishull për kryerjen e veprave penale të ndryshme që të vuajnë dënimin në Shqipëri. E nëse kjo ndodh, atëherë shteti shqiptar do të vihet mjaft në siklet për t’i mbyllur ata në institucionet penitenciare, për shkak të kapaciteteve dhe kostove që duhen për t’i mbajtur. Në Mbretërinë e Bashkuar ankohen se deri më tani, për të burgosurit shqiptarë janë harxhuar 21 milionë sterlina.
Nëse të burgosurit kthehen, atëherë kjo do të jetë barrë e madhe për shtetin shqiptar, që me mjaft vështirësi ka arritur të menaxhojë problemet ekonomike në vend.
Vetëm 24 të burgosur shqiptarë janë rikthyer në Shqipëri në gjashtë vite. Gazeta britanike “The Telegraph” shkruan se burgjet në ishull po mbushen plot me të burgosur nga Shqipëria, duke shënuar rekorde, e kjo rëndon në xhepat e taksapaguesve.
Gazeta pyet se përse këta të burgosur nuk kthehen në vendlindjen e tyre, duke qenë se në vitin 2013 është firmosur një marrëveshje mes dy vendeve, në bazë të së cilës një i burgosur shqiptar që është dënuar në Britani, mund ta kryejë dënimin në Shqipëri.
Tani numri i shqiptarëve në burg ka shkuar më shumë se katërfish, 876, e ata përbëjnë numrin më të madhe kriminelëve të huaj në qelitë e Britanisë së madhe.
Në 2013, ishin 100 shqiptarët që kishin të drejtë të transferoheshin në burgjet shqiptare.
Atëherë shqiptarët ishin grupimi i 16 më i madh në burgjet britanike, kurse tani janë të parët, të ndjekur nga polakët, 754, rumunët 734 dhe irlandezët, 707.
Financuar Nga Bashkimi Europian
