Flash News

Evazioni fiskal i ‘Bankers’, lihet në burg CEO kinez dhe ish-drejtori

Përplasen dy makina në aksin Sarandë-Delvinë, 4 të plagosur

Alarm për bombë, Policia largon deputetët dhe mediat nga ndërtesa e Kuvendit të Kosovës

“Vullneti i popullit” dhe ironia e dorëheqjeve të komanduar

Përfundon pa ndryshime rinumërimi i votave në Durrës

KRYESORE

Reforma në Drejtësi, ish-ministri Muçi bën bilancin e tre viteve: Ka dështuar! Po përdoret për hakmarrje

Politiko 12 Korrik 2019, 09:26

Reforma në Drejtësi, ish-ministri Muçi bën bilancin e tre

Më 21 korrik 2016 parlamenti shqiptar miratoi me 140 vota reformën në drejtësi. Për pak ditë mbushen 3 vjet nga ai miratim por cili është bilanci i kësaj reforme në këto 3 vjet. Gjatë emisionit “Debati në Channel One” të gazetarit Roland Qafoku u bënë publike shifrat që lidhen me këtë reformë.

Ish-Ministri i Drejtësisë, Shefqet Muçi, një juristët më të njohur në vend dhe profesor i Të Drejtës Penale e cilëson këtë reformë një dështim.

“Reforma në drejtësi është thjesht një eksperiment në Shqipëri dhe për mua ka dështuar. Janë disa institucione që nuk ekzistojnë, janë 35-40 mijë dosje në Gjykatën e Lartë që presin të shqyrtohen dhe kjo është një gjendje skandaloze. Askush nuk mund të mburret dhe të thotë që ne po bëjmë një reformë të suksesshme. Flasin vetëm ata që e kanë filluar këtë punë dhe nuk duan të tërhiqen nga gabimet që kanë bërë. Nuk pranojnë dështimin për mënyrën se si e kanë bërë këtë reformë. Ne si specialistë kemi folur publikisht që në fillim që kjo mënyrë do sjellë shumë probleme dhe zvarritje por nuk na dëgjoi kush. Edhe më e rëndë janë disa propozime sidomos të të huaje që për në Gjykatën e Lartë të marrim nga gjykatat e tjera. Kjo është skandaloze. Një tjetër problem është kur politikanë të ndryshëm deklarojnë se kundërshtari politik ka frikë nga kjo reformë. Ky është sabotim i pastër i reformës. Kjo krijon përshtypje të gabuar sikur reforma në drejtësi bëhet për të gjykuar emrat dhe jo sistemin. Reforma në drejtësi bëhet pa emra. Nëse ne bëjmë një reformë për të goditur njërin apo tjetrin ajo nuk është më reformë. Ajo është hakmarrje”, shprehet Muçi.

Por deklarata më e bujshme e Muçit ishte se sipas tij tashmë nuk mund ta quajmë kushtetutë por thjesht një rregullore. “Ajo është ndryshuar aq herë edhe për gjëra nga më banalet dhe tashmë nuk mund të quhet më Kushtetutë, por një rregullore e zakonshme që ka ndryshuar dhe mund të ndryshojë sa herë i teket politikës”, tha juristi.

Deri tani nga ky proces janë bërë pjesë e reformës 172 gjyqtarë dhe prokurorë. Nga këta, 35 gjyqtarë dhe prokurorë janë larguar nga sistemi duke dhënë dorëheqjen dhe duke mos kaluar asnjë fazë të vettingut. Ndërkohë 73 gjyqtarë dhe prokurorë kanë kaluar vettingun, ndërsa 64 gjyqtarë dhe prokurorë nuk e kanë kaluar vettingun. Në këto 3 vjet janë ngritur vetëm dy institucione: Këshilli i Lartë i Prokurorisë KLP dhe Këshilli i Lartë i Gjyqësorit KLGJ.