Tonelata kanabisi në Llakatund, mes të arrestuarve edhe 2 policë

Rreth 17.2 ton lëndë narkotike e paketuar e gatshme për tu trafikuar janë sekuestruar nga policia në dy operacione.

15.3 ton u kapën në fshatin Llakatund të Vlorës  në tre banesa,  gjatë një operacioni ku u përshinë edhe Forcat e Ndërhyrjes së Shpejtë si dhe u mbikqyr nga krerët më të lartë të polici dhe prokurorisë së Vlorës.

Në pranga ranë 12 persona mes të cilëve dy punonjës policie, djali i një inspektori policie dhe kryeplaku i fshatit Llakatund.

Në oborrin e banesës së inspektorit te zones Lirim Lamaj, i cili është prangosur së bashku me të vëllanë Astrit Lamaj, policia gjeti  një parcelë me rreth 270 rrënjë lëndë narkotike kanabis sativa.

Ndërkohë sasia tjetër prej 15 ton drogë u gjet në formë presimi dhe çokollate, të ndara nëpër pako dhe thasë plastikë të zinj. Gjithashtu janë sekuestruar 5 armë zjarri automatik kallashnikov.

Në orët e pasdites policia tha se janë sekuestruar 600 kg kanabis e fshehur  shkurre në fshatin Drithas. Dyshohet se toka ku u gjet droga është në pronësi të Myzafer Tushajt dhe të vëllait të tij F.Tushaj.

Ndërsa sasia tjetër prej 1.3 ton u kap  në “Plazhin e Gjeneralit”  në një furgon, i cili mendohet se do ta transportonte me skaf drejt brigjeve italiane. 

Por ndërsa në Vlorë, operacioni u bë në bazë të informacioneve të mëparshme të policisë sekuestrimi i sasisë së drogës afër “Plazhit të Gjeneralit” u bë rastësisht gjatë një kontrolli rutinor të policisë për kontrollin e mjeteve të vjedhura.

Policia i ka kërkuar një furgoni të ndalojë për shkak të dritave të gjata. Drejtuesi i mjetit nuk është bindur. Ai ka braktisur mjetin dhe është larguar me vrap.

Pas kontrollit të furgonit u gjetën 1.3 ton drogë.  Policia tha se ka arrestuar tre persona dhe tre të tjerë u shpallën në në kërkim. Në pranga kanë përfunduar Joni Sadikaj, Roland Hysenbelliu dhe Kejvi Hajdari. Ky i fundit është djali i ish-shefit të krimeve në Gramsh Artur Hajdari, i cili aktualisht mban postin e inspektorit të policisë në Peqin.

Ndërkohë disa orë më vonë, policia ka zbuluar dhe skafin që do transportonte drogën drejt Italisë, i cili u  u gjet në një distancë të afërt me furgonin.

Afër skafit me përmasa të mëdha u gjet dhe një zetor që do bënte ngarkesën.

Për rastin e Kavajës hetimet i kanë kaluar Prokurorisë së Krimeve të Rënda pasi ka dyshime se mund të jenë të përfshirë edhe zyrtarë të policisë së Gramshit dhe Peqinit.

Operacionit janë përshëndetur edhe nga ministri i Brendshëm, i cili me anë të një statusi në FB ka përshëndetur punën e policisë.

Të arrestuarit

1-  Inspektor Lirim Lamaj, 49 vjeç, me detyrë SPZ në Komisariatin e Policisë Vlorë, për veprat penale “Kultivimi i bimëve narkotike” dhe “Shpërdorim detyre” parashikuar nga nenet 284 e 248 të Kodit Penal.

2-  Inspektor Avdyl Sinanaj, 56 vjeç, me detyrë SPZ në Komisariatin e Policisë Vlorë, për veprën penale “Shpërdorim detyre” parashikuar nga neni 248 i Kodit Penal.

3-  Astrit Lamaj (vëllai i Lirim Lamaj , 37 vjeç, banues në fshatin Drithas, Vlorë, arrestuar për veprën penale “Kultivim i bimëve narkotike”, parashikuar nga neni 284 i Kodit Penal.

4-  Balil Gjata, 69 vjeç, banues në fshatin Drithas të Njësisë Administrative Shushicë, Vlorë, me detyrë Kryeplak i fshatit Drithas. Arrestuar për veprat penale “Shpërdorim detyre” dhe “Moskallëzim krimi”.

5-  Myzafer Tushaj, 66 vjeç, banues në fshatin Drithas, Vlorë.

6-  Ervin Tushaj, 42 vjeç, banues në fshatin Drithas, Vlorë.(Babë e birë, të cilët kishin strehuar lëndën narkotike në banesën e shtetasit Z.A).

7-  Rakip Arapaj, 58 vjeç, banues në fshatin Drithas, Vlorë (I’u gjet sasi e konsiderueshme me lëndë narkotike në banesën e tij).

8-  Kudret Tushaj, 71 vjeç, banues në fshatin Drithas, Vlorë.

9-  Elion Tafili, 43 vjeç, banues në fshatin Llakatund, Vlorë.(Babë e birë, i’u është gjetur një pjesë e lëndës narkotike në banesën e tyre në fshatin Drithas).

Nga ana e policisë vijojnë veprimet proceduriale në lidhje me peshimin e lëndës narkotike deri në përcaktimin e saktë të peshës së saj. Operacioni vazhdon dokumentimin e plotë ligjor.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm