Ekspertja e ekonomisë, Ornela Liperi e konsideron skemë piramidale dhe mafioze koncensionin e qeverisë për aksin rrugor Milot- Balldren, ku 1 km do të kushtojë rreth 16 milionë euro. Sipas Liperit, kostoja e rrugës është rritur me 52 milionë euro brenda gjashtë muajve, ndërsa konstaton se kompania fituese nuk ka aq asete financiare sa të përfundojë segmentin rrugor.
“Për garën ka pasur një garë formale. Në tetor është shpallur tenderi dhe tenderi i parë ishte në vlerën 161 mln euro. Pas shpalljes së tenderit të parë ke pasur një rinegociim pa garë. Një praktikë që nuk ndodh në Shqipëri, që nuk është e mbështetur në asnjë lloj ligji.
Në mënyrë të papritur, kur doli kontrata, u pa që ishte rritur 213 mln euro sepse aty thuhej se ishte rinegociuar për interesat dhe mbi kapitalin 140 mln euro do paguhet 5% interes. Ky është elementi i parë që këtu nuk ka pasur asnjë lloj gare, asnjë lloj transparence. Duhet ta shohin organet nëse është e ligjshme apo jo. Elementi i dytë tek mënyra e financimit, unë shoh dy gjëra, një skemë piramidale dhe një skemë tjetër mafioze. Në qoftë se do flasim për skemën piramidale e kompanisë, është shumë e qartë që kompania nuk ka para. Pasuaria e kompanisë, duke përfshirë kapitalin, nëse shet çdo gjë, është diku tek 16 milionë euro. Kompania do marrë kredi, që jepet me garanci shtetërore, se asnjë bankë nuk i jep kredi kësaj kompanie.
Në dy vitet e para, kompania do punojë me para që nuk i ka të vetat. Kredia po merret në emër të shtetit, është sikur ta ketë marrë shteti, por po e merr me 5.5%. Skema tjetër mafioze, është që futen furnitorët dhe është e qartë që këta persona do të marrin për 13 vjet pesëfishin e investimit, që është një investim goxha i mirë”, deklaroi Liperi në emisionin ‘Të paekspozuarit’.
Financuar Nga Bashkimi Europian
