Rama pas takimit me Dendias: Asnjë hezitim nga Greqia për të drejtën e minoriteteve! Pensionet po përpiqemi t'i zgjidhim

Kryeministri Rama në një konferencë për shtyp pas takimit me Ministrin e Jashtëm grek, Nikos Dendias, ka treguar çështjet kryesore të diskutuar mes palëve.

Ndërsa e vuri theksin tek marrëdhëniet e mira midis dy vendeve, si partnere strategjike, Rama shtoi se të dy vendet kanë bërë të maksimumin për të drejtat e shqiptarëve në Greqi dhe e anasjellta.

Ndërkaq, referuar çështjes së pensioneve, Rama tha se kjo është një çështje në diskutim e sipër për shkak të vlerës së madhe të parave që kërkon të investohen nga qeveritë.

"Sot e mirëpresim mikun tonë për të folur për rrugën e përbashkët të së ardhmes si dy fqinjë që nuk e kemi zgjedhur njëri tjetrin por jemi bashkë nën të njëjtin diell prej mijëra vjetësh dhe kemi detyrimin që të bëjmë më të mirën dhe në nivelin politik kemi detyrimin që të bëjmë atë që njerëzit e zakonshëm bëjnë në marrëdhëniet e përditshme dhe që ne duhet t'i ngremë në të njëjtin nivel pritshmërie, ambiciesh, shpresash.

Me këtë frymë ne kemi hapur një kapitull shumë pozitiv me qeverinë e Greqisë. Dua ta risjellë faktin se përveç ministrit që ka qenë këtu personalisht, kryeministri ka qenë ndër të parët që është interesuar pas tragjedisë dhe ka qenë në vijimësi i dëshiruar për t'u informuar qoftë për kërkim shpëtimin dhe rindërtimin dhe i gatshëm së bashku me qeverinë edhe në atë moment vështirësie që u krijua në kufi si rezultat i masave të marra.

Greqia ka qenë një partner strategjik dhe mbetet, e konsiderojmë Greqinë një fqinj të cmuar dhe patjetër që partneriteti ynë është një partneritet për të ardhmen, duke mos harruar gjithçka që na lidh nga e shkuara. Greqia ka qenë një ndër vendet, e cila u përfshi në dhënien e kontributeve të drejtëpërdrejta gjatë Konferencës së Donatorëve.

Ne edhe sot kemi konfirmuar atë cka kemi thënë më parë, që "jemi dakord për të zgjidhur me vullnetin e mirë dhe angazhimin e përbashkët çështjet të cilat janë të të dy vendeve tona".

Çështja e minoriteteve greke në Shqipëri nuk është vetëm çështje greke, por edhe shqiptare. Nëse ne duam standarte dhe mundësi të barabarta për të gjitha minoritetet, këtë nuk e bëjmë sepse këtë e thotë Greqia, por për një vizion të përbashkët për të ardhmen evropiane. E njëjta gjë vlen edhe për minoritetet shqiptare në Greqi.

Skemi patur asnjë hezitim në asnjë moment kur vjen puna për t’u angazhuar dhe bërë gjithçka që mundet për shqiptarët në Greqi, por edhe minoritetin grek në Shqipëri.

Dua të sjellë në vëmendje që fal vullnetit të mirë të kryeministrit Mitsotakis u bë njohja në parlamentin grek të lejeve të drejtimit të qytetarëve shqiptar, u bë pranimi i vulës apustile, dhe po kështu edhe dakordësia për marrëveshje që lidhen me njohje të dokumentave. Diskutimi për pensionet është një çështje e hapur.

Por me Greqinë dhe Italinë ku është prania më e madhe e emigrantëve shqiptar qysh pas viteve ‘90, nuk është një diskutim i lehtë. Kjo jo sepse mungon dëshira, apo mungon angazhimi, por sepse për hir të së vërtetës bëhet fjalë për një zgjidhje që në aspektin financiar kërkon një angazhim serioz.

Megjithatë, procesi i diskutimit vazhdon me shprehjen e vullnetit të mirë, për ta zgjidhur. E falënderova dhe e falënderoj publikisht ministrin për faktin se pavarësisht marrëdhënieve të tensionuara që kemi patur, Greqia nuk ka qenë asnjëherë pengesë për integrimin e Shqipërisë në BE”, tha Rama.