A po përgjohemi pas instalimit të DPI në kompanitë celulare, AKSK reagon për Politiko: Ka siguri, pajisjet u morën borxh në Izrael

Përdorimi i teknologjisë Deep Packet Inspection (DPI) nga Autoriteti Kombëtar për Sigurinë Kibernetike (AKSK) ka ngritur pyetje të shumta për transparencën, privatësinë dhe efektivitetin e saj në bllokimin e aksesit të TikTok në Shqipëri.

Në një përgjigje zyrtare për Politiko.al, AKSK thekson se DPI nuk ka aftësi teknike për të ndërhyrë në përmbajtjen e komunikimeve apo për të profilizuar sjelljen e individëve.

“Platforma DPI analizon VETËM kokën (headerin) e paketës së protokollit të internetit IP dhe e ka teknikisht të pamundur të deshifrojë/ç`kodojë dhe analizojë vetë përmbajtjen e paketës (payload-in). Komunikimet me përmbajtje që transmetohen në internet në vendin tonë, janë 100% të enkriptuara me çelsa të bazuar në algoritma asimetrik për shkëmbimin e tyre, si edhe simetrik për kodimin e përmbajtjes. Në këto kushte DPI NUK arrin të aksesojë dhe as të lexojë përmbajtjen e komunikimit. DPI sheh vetëm që “diçka po dërgohet diku”, por nuk mund të identifikojë dërguesin, marrësin dhe as përmbajtjen e informacionit”, thuhet në përgjigjen e AKSK.

Për implementimin e DPI, ky autoritet sqaron se janë përfshirë kompanitë celulare Vodafone dhe One, si dhe të gjithë ofruesit e shërbimit të internetit me shumicë (Wholesale), të cilët shërbejnë si ndërmjetës midis pikave të hyrjes së internetit në vendin tonë dhe ofruesve të tjerë të shërbimit të internetit.

Çfarë është Deep Packet Inspection (DPI)?
DPI është një platformë e cila analizon në mënyrë të detajuar paketën e trafikut të internetit dhe identifikon se nga cilat shërbime/platforma gjenerohet ky trafik dhe në varësi të kushteve të vendosura paraprakisht, lejon ose e bllokon atë.
"Çdo përmbajtje që transmetohet përmes internetit, për shembull, një bisedë në WhatsApp apo aplikime të ngjashme, një video në TikTok, apo një email, është si një paketë që transmetohet në mënyrë të enkriptuar përmes internetit", sqaron AKSK. 

A po përgjohemi?

A mund të ndodhë përgjimi i komunikimeve nga përdorimi i platformës DPI, pas alarmit të dhënë në media nga komuniteti i ekspertëve të teknologjisë në Shqipëri?

“Jo, nuk mund të ndodhë, pasi platforma DPI është vendosur në portën hyrëse të ofruesve të internetit. Platforma DPI e ngritur në ofruesit e shërbimit të internetit në vendin tonë, analizon VETËM kokën (headerin) e paketës së protokollit IP dhe nuk ka asnjë mundësi teknike të

deshifrojë/ç`kodojë dhe analizojë vetë paketën (payload), për shkak se ajo është e enkriptuar me çelsa asimetrik të gjatë për shkëmbimin e tyre dhe çelsa simetrik të avancuar për ruajtjen e përmbajtjes”, thuhet në reagimin e AKSK për Politiko.al.

Po ashtu, në sqarim thuhet se “Platforma DPI e ka të pamundur teknikisht dhe shkencërisht të profilizojë sjelljen në nivel individi, pasi trafiku në internet në 98,7% të rasteve është me IPv4 Publike (Ku në 95% të rasteve është në nivel entiteti (jo individi) ) dhe 1,3% të rasteve është me IPv6 e cila përdor kokë shtesë (extension header) të mbështetur në teknikën enkriptuar IPSec (ESP/AH). Rastet përjashtimore mund të shihen dhe të rregullohen përmes disa kushteve të veçanta teknike, si: Përdorimi tuneleve të sigurtë, përjashtimi, etj.”.

Pajisjet janë marrë borxh nga Izraeli

Në reagimin zyrtar, AKSK sqaron se pajisjet nuk janë blerë, por janë marrë borxh nga Izraeli për një periudhë një-vjeçare.

“Për implementimin e teknikës DPI jemi mbështetur nga homologët tanë Izraelit, të cilët kanë ofruar suport logjistik dhe ekspertizë teknike.

Mbështetja logjistike konsiston në ofrimin e platformës dhe pajisjeve të nevojshme hardëare/softëare të cilat i janë ofruar AKSK-së në huapërdorim (Jo donacion), pa kosto financiare, për një periudhë 12-mujore. Implementimi teknik pranë operatorëve është kryer nga ekspertët e AKSK-së dhe ekspertët Izraelit”, sqaron AKSK.

Sa i takon bazës ligjore, AKSK argumenton se masat janë të bazuara në vendime ligjore si më poshtë:

 

Përgatiti: Suela Gjidede-Politiko.al