Manolis Kefalogiannis, kryetari i ri i Delegacionit të Parlamentit Europian për Komitetin e Stabilizim- Associmit, në një intervistë për European Western Balkans ka folur për detyrat e Shqipërisë, deri në maj 2020, duke theksuar nevojën se vendi nuk duhet të shmanget nga rruga e antarësimit.
Ai është anëtar i Nea Demokracisë, së kryeministrit grek Micotaqis dhe pjesë e partive Popullore Europanë në PE dhe, si deputet grek ai ka përmendur edhe problemet në marrdhëniet dypalëshe si problemin e pronave, por edhe përcaktimin e Zonës së Lirë Ekonomike mes dy vendeve.
A besoni se rezoluta e miratuar së fundmi e Parlamentit Europian për procesin e pranimit të Shqipërisë dhe Maqedonisë së Veriut do të ndikojë te liderët e shteteve anëtare të BE për të ndryshuar vendimin e tyre për këtë çështje?
Manolis Kefalogiannis: Vendimi për fillimin e procesit të antarësimit është shtyrë, ai është caktuar për majin e vitit 2020. Megjithatë, kjo është diçka që nuk duhet të zhgënjejë dy vendet kandidate dhe njerëzit e tyre. Ata duhet të vazhdojnë me përpjekjet e tyre për të përfunduar intensivisht të gjitha reformat e nevojshme pa devijuar nga orientimi i tyre europian dhe e ardhmja e tyre europiane. Greqia gjithmonë ka pranuar që në rrethana të caktuara Bashkimi Europian të mund të fillojë procesin e pranimit i cili përfundimisht do të çonte në hyrjen e tyre në familjen e madhe europiane. Kjo është diçka që do të kontribuojë në stabilitetin dhe paqen në zonën e Ballkanit e cila ka përjetuar kaq shumë turbullira gjatë shekujve.
Debati plenar javën e kaluar tregoi se grupi i Renew Europe (Europa e Përtërirë) është, në të vërtetë, mjaft i ndarë në çështjen e negociatave të pranimit. A është e saktë të thuhet se kjo nuk është rasti me Partinë Popullore Europiane?
MK: Bashkimi Europian duhet të përballet me dy sfida në pesë vitet e ardhshme, thellimin dhe zgjerimin. Unë me të vërtetë besoj se mund të bëjmë hapa të mëdhenj në të dy fushat. Në Samitin e fundit Europian, Presidenti Francez Emmanuel Macron, ka qenë paksa ngurrues për Zgjerimin, duke u përqendruar më shumë te thellimi, mbase për shkak të Brexit. Mbretëria e Bashkuar padyshim ka kontribuar në një Europë të lirë, kështuqë Brexit është një humbje e madhe për të gjithë ne që besojmë në idealin europian.
Sidoqoftë, Europa është vendi i dialogut krijues dhe kompromisit, kështu që unë sinqerisht shpresoj se deri në majin e ardhshëm çdo kundërshtim nga Franca do të jetë fshirë dhe procesi i pranimit të dy vendeve të Ballkanit Perëndimor do të fillojë.
A besoni se shkëputja e Maqedonisë së Veriut nga Shqipëria herën tjetër që KE vendos për këtë çështje do të ishte një ide e mirë, nëse kompromisi është më i lehtë për t’u arritur në atë mënyrë?
MK: Unë mendoj se çdo shkëputje e tillë do të dërgonte mesazhin e gabuar. Do të krijonte më shumë probleme sesa ato që me gjasë do të zgjidheshin. Dhe do të krijonte më shumë probleme me stabilitetin politik në Shqipëri dhe përfundimisht një diskurs anti-europian si me liderët shqiptarë, ashtu edhe me shoqërinë, e cila do të kuptonte se përpjekjet e tyre janë shpërfillur.
Bashkimi Europian duhet të marrë një vendim jo se sa vende do të hyjnë dhe as se sa proceset e pranimit do të ndryshojnë në tërësi. Bashkimi Europian duhet në të njëjtën kohë të jetë në gjendje të pranojë vende të reja, si dhe të punojë drejt unifikimit të tij. Ky bashkim do të thotë që Europa ka një zë, një vendim, një politikë të përbashkët në çdo fushë: në politikë, në ekonomi, në punët e jashtme, në çështje të sigurisë dhe terrorizmit, në mbrojtjen e kufijve.
Cilat çështje do të vendosni me përparësi si Shefi i Delegacionit të PE në Komitetin e Stabilizim-Asociimit BE-Shqipëri?
Bisedimet e pranimit me Shqipërinë do të kontribuojnë në thelb në forcimin e demokracisë dhe sundimit të ligjit në vendin fqinj. Çështjet me të cilat Bashkimi Europian po përballet sot me Shqipërinë kanë të bëjnë me përmirësimin e sistemit ligjor dhe institucional drejt forcimit të transparencës dhe luftës kundër krimit të organizuar sepse ato çështje janë jetike për jetën e përditshme të qytetarëve.
Përfundimi i reformës në sistemin gjyqësor është një kërkesë themelore e qytetarëve. Eshtë gjithashtu një parakusht për të rifituar besimin në sundimin e ligjit, në institucionet publike dhe politikanët. Ndërkohë, masa dhe veprime të fuqishme janë të nevojshme për të tkurrur rrjetet kriminale të përfshira në veprimtari të paligjshme.
Shqipëria duhet të tregojë respekt të plotë për të drejtat sovrane të fqinjëve, të të drejtave të njeriut dhe të të drejtave të minoriteteve. Çdo vend nën procesin e pranimit në Bashkimin Europian duhet të përputhet me kriteret e Kopenhagës.
Situata e brendshme politike në Shqipëri, brenda dhe jashtë parlamentit, është karakterizuar si e polarizuar nga Raporti i Komisionit Europian. A ka diçka që Parlamenti Europian mund të bëjë për të ndihmuar palët të arrijnë një kompromis?
Aderimi në Bashkimin Europian duhet të jetë një qëllim kombëtar për Shqipërinë dhe jo një qëllim për njërën ose tjetrën parti politike. Ai gjithashtu duhet të konsiderohet si një platformë e pajtimit midis partive politike. Raporti i Komisionit Europian nënvizon saktësisht këtë fakt, dhe me keqardhje. Unë shpreh sigurinë time që përpara qëllimit të përbashkët, ata të gjithë do të lënë mënjanë interesat e tyre dhe do të përqendrohen në të mirën e përbashkët, aderimin europian të vendit.
Si e vlerësoni gjendjen e marrëdhënieve bilaterale të Shqipërisë me fqinjët e saj? A ka ndonjë çështje të hapur që mund të komplikojë procesin e pranimit në BE?
MK: Siç e përmenda në fillim, vendi im është në favor të negociatave të pranimit me vendet e Ballkanit Perëndimor për aq sa plotësohen terma dhe kushte të caktuara. Ne zgjedhim një strategji pranimi “clean ëay”. Për Shqipërinë, respektimi i plotë i të drejtave të sovranitetit të vendeve fqinje, i të drejtave të pakicave – si i minoritetit kombëtar grek, i së drejtës së vetëvendosjes dhe zgjedhjes së lirë të identitetit fetar dhe respektimit të pronave personale për të cilat Kryeministri shqiptar Edi Rama u pajtua gjatë vizitës së tij të fundit në Athinë dhe takimit të tij zyrtar me Kryeministrin Grek Kyriakos Mitsotakis.
Sigurisht që ka çështje bilaterale që duhet të zgjidhen, siç është përcaktimi i Zonës Ekonomike Ekskluzive të të dy vendeve.
*Përkthimi: Politiko.al
Discussion about this post