Gazetari dhe analisti Armand Shkullaku deklaroi mbrëmë në emisionin ‘Opinion’ se kryeministri Edi Rama bën batuta ‘live’ me familjet e prekura nga tërmeti me qëllim shmangien e debateve ku ka përgjegjësi.
Sipas gazetarit, janë evidentuar deri tani tri shkelje që kryeministri ka përgjegjësi, por sipas tij i kalon me batuta ‘live’.
“Janë të paktën tre që ka përgjegjësi shtetërore. Thumana, mbas tërmetit të 21 shtatorit dhe zëvendëskryeministri Erion Braçe ka thënë se bashkia i ka lajmëruar të gjithë banorët ku ndodhi tragjedia ku thoshte se ai pallat nuk është i banueshëm. Banorët thonë se kishin shkresën nga bashki që ai pallat nuk është i banueshëm. Deri më sot organet shtetërore kanë refuzuar, kryeministri, qeveria që të nxjerrin këtë shkresë. Për mua futja e banorëve në një pallat që ka pasur rrezik shembje dhe vdekja e tyre është krim shtetëror.
Kavaleshenca e ministrisë së Brendshme, që një raporti i përbërë nga katër ekspertë plus një arkitekt i bashkisë së Durrësit i drejtohet ministrisë së Brendshme, Zotit Lleshaj dhe i thotë që kjo godinë ka marrë dëmtime nga tërmeti i 21 shtatorit, nuk janë prekur strukturat mbajtëse por ka rrezik eminente që rënia e tullave dhe objekteve të tjera mund të shkaktoi vdekje. Dhe në atë godinë, kur ka ndodhur tërmeti ka pasur student, por kanë ikur, ama një person që ishte brenda godinës humbi jetën, për mua është krim shtetëror se është paralajmëruar.
E treta është, mos krijimi i agjencisë së emergjencave civile. Po të marrë vetëm një rast. U tha se nuk kishte kamera termike. Vetëm pas tre ditësh u gjetën në depot e zjarrfikësve kamera termike që i ishin dhuruar Forcave tona të Armatosura nga NATO, pas tre ditësh zbuluam që i kishim. Pikërisht për të mos u ndalur te këto në shikojmë cirkun e Ramës”, thotë Shkullaku.
Financuar Nga Bashkimi Europian
