Kjo është mosha e duhur për t’i dhënë fëmijës tuaj një smartphone

Prindërit në mbarë botën po përballen gjithnjë e më shumë me dilema kur bëhet fjalë për kohën e duhur për t'u dhënë fëmijëve të tyre një smartphone. Debati rreth kësaj çështjeje po nxehet, ndërsa provat kërkimore tregojnë se përdorimi i hershëm i smartphone-ve mund të ketë efekte negative në shëndetin mendor të fëmijëve.

Një studim nga Sapien Labs, i publikuar vitin e kaluar dhe që përfshiu 27,969 të rinj të moshës 18-24 vjeç nga 41 vende, zbuloi se sa më herët që të rinjtë marrin smartphone-in e tyre të parë, aq më të prekshëm jane.

Sipas studimit, rreth 74% e vajzave që kishin marrë smartphone-in e tyre të parë në moshën gjashtë vjeç raportuan se ndiheshin të trishtuara ose të stresuara. Kjo përqindje ra në 52% për ata që kishin marrë smartphone-in e parë në moshën 15 vjeç.

 

Ndër djemtë, 42% e atyre që kishin marrë smartphone-in e parë në moshën 6 vjeç përjetuan trishtim ose stres, një përqindje që ra në 36% për ata që kishin marrë smartphone-in në moshën 18 vjeç.

 

Siç raporton CNBC, smartphone-t janë bërë një pjesë e pandashme e jetës së përditshme në një botë gjithnjë e më të lidhur online. Shumë prindër duan t'u japin fëmijëve të tyre këto pajisje për të gjurmuar vendndodhjen e tyre dhe për të qëndruar në kontakt me ta kur janë jashtë shtëpisë. Por pyetja mbetet: Sa herët është e sigurt për shëndetin e fëmijëve?

 

Zach Rausch, një studiues në Stern School of Business në Universitetin e Nju Jorkut, thekson se është e rëndësishme që smartphone-t të mbahen larg fëmijëve para adoleshencës. Sipas tij, është e rekomanduar që përdorimi i smartphone-ve të shtyhet deri në moshën 14 vjeç dhe rrjetet sociale deri në moshën 16 vjeç.

 

Idealisht, shton ai, kjo do të zbatohej në të gjitha nivelet e arsimit deri në shkollën e mesme, duke ndaluar përdorimin e celularëve në shkollë.

 

Shkolla e mesme konsiderohet kritike

 

Sipas Rausch, rekomandimet për moshën 14 vjeç për smartphone-t dhe 16 vjeç për mediat sociale janë të rëndësishme për dy arsye kryesore:

 

Adoleshenca e hershme karakterizohet nga pasiguria dhe ndjeshmëria e tepruar, që e bëjnë këtë periudhë veçanërisht sfiduese.

 

Gjithashtu, në moshën 12-13 vjeç, është vërejtur shkalla më e lartë e bullizmit, kështu që vonimi i përdorimit të smartphone-ve mund të ndihmojë në parandalimin e përkeqësimit të këtij problemi.

 

Këto kufij moshe janë konsideruar nga studiuesit si të arsyeshëm dhe bazë për të shmangur fenomenin e fëmijëve të moshave 6 apo 10 vjeç që kanë smartphone-in e tyre.