Fushata presidenciale mes pandemisë së koronavirusit

Drejtori i stafit të nënpresidentit Mike Pence ka rezultuar pozitiv me koronavirus, por kjo nuk e ka ndaluar nënkryetarin e ShBA-së që të vazhdojë me fushatën e tij tejet intensive.

Pence nuk pranon të izolohet, megjithëse ai ka pasur një  kontakt të ngushtë me shefin e kabinetit, Marc Short.

Rreth 57 milion vota janë hedhur tashmë në votimet e hershme, një shifër rekord e nxitur kryesisht nga pandemia, shkruan BBC.

Sfiduesi Demokratik i Trump, ish-nënkryetari Joe Biden, ka një mesatare të epërsisë prej tetë pikësh në sondazhet kombëtare. Por gara është shumë më afër në disa shtete të rëndësishme.

 Pence, i cili drejton Task Forcën e Shtëpisë së Bardhë të Koronavirus-it dhe gruaja e tij, Karen, “gëzojnë shëndet të mirë”, tha zëdhënësi i tij Devin O'Malley në një deklaratë.

 Pence u pa i veshur me një maskë ndërsa u kthye në Uashington DC pas një fushate në Florida dhe pasi lajmi i diagnozës së Short u bë publik, raporton agjencia e lajmeve AP.

Më parë këtë muaj, kandidatja demokrate për nënkryetare Kamala Harris ndaloi përkohësisht udhëtimin e saj në fushatë pasi dy anëtarë të stafit të saj dolën pozitivë.

Ndërkohë, raportet e medias thonë se një këshilltar tjetër i Pence, Marty Obst, gjithashtu doli pozitiv kohët e fundit. Rastet kanë ngritur pikëpyetje në lidhje me protokollin e Shtëpisë së Bardhë, tre javë pasi residenti Trump u shtrua në spital pasi ishte infektuar.

Nënkryetari është planifikuar të mbajë një tubim ditën e sotme në Kinston, Karolina e Veriut.

Çfarë tjetër po ndodh me ecurinë e fushatës?

Presidenti Trump do të paraqitet në New Hampshire të dielën, një ditë pas fushatës në Karolinën e Veriut, Ohio dhe Wisconsin. Ai është planifikuar të paraqitet në dy tubime në Pensilvani të hënën, përpara se të shkojë në Michigan, Wisconsin dhe Nebraska të martën.

Joe Biden, i cili bëri dy ndalesa fushate në Pensilvani të shtunën, nuk ka asnjë orar publik për të dielën.

Kush vendos me të vërtetë për zgjedhjet në SHBA?

Shumica e shteteve amerikane anojnë shumë nga njëra parti ose tjetra, kështu që kandidatët presidencialë zakonisht përqendrohen në një duzinë apo më shumë shtete të "fushës së betejës" që janë gati për t'u marrë.

Shtetet si Michigan, Wisconsin, Pennsylvania, Florida, Ohio dhe Carolina e Veriut shihen si më me ndikimin sepse ato historikisht janë zhvendosur midis kandidatëve republikanë dhe demokratë.

 Ata gjithashtu kanë një numër më të lartë të votave të kolegjit elektoral, të cilat vendosin rezultatin e zgjedhjeve.

 Si po ndikon koronavirusi në zgjedhje?

Më shumë se 8.5 milion infeksione janë raportuar në të gjithë vendin, së bashku me gati 225,000 vdekje, sipas Universitetit Johns Hopkins. Përhapja ka kontribuar në një rritje të votimeve postare dhe të hershme personale.

Shkencëtar i qeverisë amerikane Dr Anthony Fauci thotë se mund të ketë një vaksinë Covid në SH.B.A. para fundit të vitit 2020.

Presidenti Trump dhe demokrati Biden kanë vazhduar të paraqesin pikëpamje krejt të ndryshme gjatë rrugës.

Presidenti pretendoi që SH.B.A. mund të kishin tashmë një vaksinë "po të mos ishte për politikën". Asnjë vaksinë nuk ka përfunduar ende provat klinike.

Pavarësisht rritjes aktuale të rasteve dhe rritjes së pranimeve në spital, presidenti Trump vazhdoi të sigurojë mbështetësit se SHBA po shohin një përmirësim.

Duke folur për BBC, eksperti amerikan i sëmundjeve infective, dr. Anthony Fauci e mohoi këtë, duke thënë  "të dhënat flasin vetë".

Ndërkohë, Biden kishte si thelb të mesazhit të tij se një numër i madh amerikanësh kanë vdekur nga Covid-19 për shkak të politikave të presidentit.

"Do të jetë një dimër i errët përpara nëse nuk ndryshojmë mënyra," u tha ai mbështetësve në Bristol, Pensilvania.