Pse një marrëveshje dhe jo një koalicion PD-LSI

Partia Demokratike dhe Lëvizja Socialiste për Integrim firmosën këtë të hënë marrëveshjen mes tyre për koalicion në zgjedhjet e 25 Prillit.

Me sloganin ‘Shqipëria, shtëpia që fiton’ marrëveshja mes dy partive opozitare përcakton pikat mbi të cilat do vijojë koalicioni mes dy partive pas zgjedhjeve të 25 prillit, teksa vendosën objektiva të përbashkëta në përballimin dhe zgjidhjen e problemeve kritike të vendit.

Sa i përket përfaqësimit në të gjithë nivelet e qeverisjes së ardhshme, sipas marrëveshje do të realizohet proporcionalisht mbi bazën e rezultatit zgjedhor.

Po përse marrëveshje dhe jo në një koalicion të përbashkët?

Me ndryshimet e miratuara të Kodit Zgjedhor, partitë politike që do të garojnë në 25 prill, në koalicion mund ta bëjnë vetëm me listë unike dhe në një sigël të vetme. Kjo pikë është kundërshtuar me forcë nga opozita jashtëparlamentare që në krye të herës.

Nënkryetari i PD, Edi Paloka, në një lidhje me emisionin ‘Opinion’ javës që shkoi tregoi arsyet pse PD nuk hyri në një koalicion me LSI.

Paloka theksoi se koalicioni opozitar synon që të marrë çdo votë dhe ta maksimalizojë atë.

‘Qëllimi i këtij bashkimi është që si parti dhe si qytetarë ne të mundemi të garantojmë fitoren, me një qëllim për të sjellë më pas ndryshimin që presin shqiptarët. Marrëveshjet që kemi realizuar me partitë, janë marrëveshje që rregullojnë marrëdhëniet qoftë me kryetarët e partive qoftë me partitë me qëllim maksimalizimin e votës. Kemi një marrëveshje të hershme me kryetarët e partive’, tha Paloka.

Sa i përket vendimit që PD dhe LSI të hyjnë të ndara në zgjedhje, Paloka tha se ky është një vendim i studiuar mirë që ndikon në maksimalizimin e votës.

‘E kemi thënë edhe ne dhe LSI që qëllimi mbetet maksimalizimi i votave. Ne e kemi studiuar që PD në një krahë dhe LSI nga ana tjetër jo vetëm që do maksimalizojmë votat, por loja që bëri Rama me koalicionet do t’i kthehet në të kundërt’, u shpreh Paloka.

Nga ana tjetër, kryetarja e LSI, Monika kryemadhi pati deklaruar më herët se koalicioni PD-LSI nuk është natyral, por jetik.

Në lidhje me daljen me dy lista në zgjedhjet e 25 prillit, Kryemadhi tha se nuk duhet rënë në kurthin e çështjeve teknike.

“Nëse ti do shkosh me një listë në një qark çfarëdo ku PD ka vlerat e saj, po ashtu dhe LSI dhe partitë e tjera të opozitës kanë vlerat e tyre dhe do ishte më mirë dhe do orientoheshin shqiptarët në 140 emra apo në 280 emra”, tha ajo.

“Ajo që është e rëndësishme për të kuptuar është se anormaliteti që ka instaluar Rama sot do sjellë koalicione anormale. Pse, normale është ulja e PDIU-së me PBDNJ që nuk janë ulur asnjëherë? Vërtet koalicioni LSI-PD nuk është natyral, por është jetik për të gjithë shqiptarët dhe partitë politike”, shtoi Kryemadhi.

Në lidhje me koalicionet para dhe paszgjedhore, Kryemadhi dha disa arsyetime.

“Në një listë në vende të caktuara dobësohet PD. PD është parti më e madhe dhe duhet të vazhdojë të mbledhë votat e veta dhe në zona të caktuara PD-LSI do hyjnë në një listë përsëri. Beteja nuk bëhet midis militantëve të PD-LSI. Beteja është për të marrë votën e atyre që janë të zhgënjyer”, tha Kryemadhi.