Doli pro listave të hapura, ç’deklaronte Rama vetëm tre javë më parë në Kuvend: Kanë probleme, nuk sjellin demokraci

Kryeministri Edi Rama bëri të ditur sot qëndrimin e Partisë Socialiste pro hapjes së listave, propozim kjo e ardhur nga opozita parlamentare në drejtimin e Myslim Murrizit.

Sipas Ramës, hapja e listave nuk do të thotë ndryshim sistemi, nuk prek marrëveshjen e 5 qershorit të nënshkruar edhe me opozitën jashtëparlamentare, por ndalon koalicionet parazgjedhore.

Kemi vendosur të mbështesim hapjen e listave dhe t’i japim mundësi cdo zgjedhësi të zgjedhë subjektin politik dhe të shprehë preferencën për kandidatin e përfshirë në listën e subjektit.

Është një vendim që reflekton bindjen se hapja e listave përkon me dëshirën e një mase të madhe të shqiptarëve dhe që shkon përtej një pakice dhe përtej asaj që do të ishte zgjidhja më e thjeshtë dhe më komode për një parti të madhe dhe por edhe për mua si kryetari i partisë, që në këtë rast duhet t’u jap të gjithëve jo me fjalë por me faktin e hapjes së listave mesazhin se asnjëherë nuk ka qenë për mua prioriteti komoditeti im, por që PS-ja të reflektojë. Ideja se hapja e listave prish marrëveshjen është çmenduri”, tha Rama ndër të tjera.

Sipas tij, ndryshimet nuk vijnë si rezultat i kalkulimeve elektorale.

PS-ja është partia më e madhe e shqiptarëve sot, mbas një viti kur të bëhen zgjedhjet të shohim. Por pa asnjë diskutim, PS-ja nuk ka asnjë lloj qëllimi tjetër përveç se të përmirësojë Shqipërinë dhe ti japë sa më shumë shanse. Nuk ka asnjë lojë, apo pazar.

Opozita parlamentare ndihet e kërcënuar nga numërimi partiak, kanë të drejtën e tyre, i kuptoj. Opozita parlamentare nuk mund të marrë gjithçka që kërkon, opozita jashtë parlamentare ndihet e kërcënuar nga hapja e listave, por nuk mund ti marrin të gjithë. Por kjo PS-ja që është forca më e madhe, ka të drejtën e vet të ketë ndonjë dëshirë, ka vetëm në këtë proces, që të gjithë të tjerët të marrin sa më shumë nga ajo që kërkojnë, për ne është OK”, u shpreh kryeministri, i cili vetëm 3 javë më parë nga foltorja e Kuvendit u shpreh se listat e hapura nuk janë zgjidhje dhe nuk kanë për të sjellë cilësi në vend.

Unë nuk besoj një sekondë të vetëm që listat e hapura sjellin demokraci apo cilësi. Listat e hapura kanë problematikat e tyre. Është e pavërtetë që listat e hapura e kthejnë kryetarin  e një partie në njeri si gjithë të tjerët. Përgjegjësia e lidershipit është aty në të gjitha rastet”, deklaroi Rama në 18 qershor.