Nga ‘çunat problematikë’ te ‘boksi’ në Elbasan e Durrës, incidentet që po prijnë fushatën elektorale

Nesër (25 prill) nis zyrtarisht fushata elektorale për zgjedhjet e 25 prillit.

Nisur nga ngjarjet e ditëve të fundit, fushata po prihet nga një situata e tensionuar. Një numër i madh incidentesh janë shënuar, me në fokus përfaqësues të subjekteve të partive politike dhe simpatizantë të tyre.

E fundit ndodhi mesditën e së mërkurës, një ditë para nisjes zyrtare të fushatës. Kandidatja e LSI, e renditur e para në qarkun e Durrësit, Elona Guri është përplasur fizikisht me një person në lagjen nr.4 në qytetin e Durrësit.

Në vendngjarje kanë shkuar shërbimet e Policisë të cilët kanë shoqëruar në ambientet e Komisariatit të dyja palët në konflikt për veprime të mëtejshme.

Një ditë më parë, banderolës së Partisë Socialiste në Cërrik i është vënë flaka.

Pasi kanë pikasur gjithë çfarë ka ndodhur, zyrtarë të PS në zonë kanë njoftuar Policinë e Shtetit, të cilët kanë nisur punën për identifikimin e autorëve.

Sherri me grushte mes Luçiano Boçit dhe Gjergj Lucës

Ngjarja ka ndodhur disa ditë pas konfliktit me grushte në Labinot të Elbasanit, mes kandidatit për deputet të Partisë Demokratike Luçiano Boçi dhe biznesmenit Gjergj Luca.

Kamerat e sigurisë filmuan momentin kur Boçi godet me grushte biznesmenin Luca.

Mësohet se profesori i Universitetit të Elbasanit ka qenë duke dalë nga një takim me mbështetës të tij në një lokal të zonës, kur tek dera është ndeshur me sipërmarrësin. Kandidati i PD-së tregoi shenjat e dhunës nga përplasja, ndërsa bëri dhe denoncimin në Drejtorinë e Policisë së qarkut Elbasan.

Po në Elbasan, një grup të rinjsh kanë shkuar në zyrat elektorale të kandidates së Partisë Demokratike në Elbasan, Flutura Açka dhe i kanë kërkuar që të mos e hapin më zyrën.

Kërcënimi është bërë në zyrat elektorale të kandidates së PD-së në lagjet “5 Maji”, “Haxhias” dhe “Vullnetari”.

Anëtarë të shtabit elektoral të kandidates thanë se ishin të njëjtët persona që u konflituan Ditën e Verës në bulevardin para hotel “Skampa”.

Kandidatja për deputete bëri denoncim në Policinë e Qarkut Elbasan, ndërkohë që aktiviteti politik dhe elektoral në këto zyra është rikthyer.

“Çunat problematikë” prishin festën e Ditës së Verës

Një ditë para këtij incidenti, në 14 mars, Dita e Verës në Elbasan u kthye në një ‘fushë beteje’ mes mbështetësve të Partisë Demokratike dhe Partisë Socialiste.

Shkak u bë përplasja e agjendave të dy liderëve politikë, kryeministri Edi Rama dhe kreu i PD, Lulzim Basha.

Rama u prit me thirrjet ‘Rama ik’ në Elbasan, ndërkohë që dhe mbështetësit e PS-së, fyen dhe ofenduan ‘kundërshtarët’ e tyre. Kjo solli në një përplasje fizike mes njerëzve që ishin të pranishëm në bulevard, duke bërë që disa prej tyre të ndaloheshin. Ndërkohë përplasjet virtuale vijuan edhe mes dy liderëve, Rama dhe Basha.

Basha bëri fajtor Ramën se kishte ardhur i shoqëruar nga banditë me pistoleta në brez, ndërsa ky i fundit theksonte se Basha vjen në festë me flamuj partie duke nxitur përplasje.

Gazmend Bardhi, sekretar i përgjithshëm i PD, publikoi më pas emrat e mbështetësve të socialistëve si persona më precedent penalë.

“Ka disa nga eksponentët e krimit të organizuar që shoqëronin sot Edi Ramën të armatosur dhe nën mbrojtjen e Policisë së Shtetit.

KELMEND YMER XHAFERRI ( pseudonimi Kel Çami) ka qënë më parë i dënuar për disa vepra penale dhe i përfshirë në incidentin kundër punonjësve të policisë në Elbasan tek Tregu Ushqimor, duke thyer me forcë postobllokun e policisë.

NINO, anëtar i krimit të organizuar.

MARSEL RROKAJ, anëtar i krimit të organizuar dhe djali i Agron Rrokës, drejtori i burgut Elbasan.

ERIS SKILJA, anëtar i krimit të organizuar.

NALDI METAJ (i njohur me pseodonimin BABALJA), anëtar i krimit të organizuar.

GËZIM RUSI, anëtar i krimit të organizuar”, shkruante Bardhi.

Incidenti në zyrën e FRD

Në 12 shkurt, Presidenti Ilir Meta u përplas fizikisht me efektivët e Policisë Bashkiake, pasi shkoi në zyrat e Frymës së Re Demokratike ku takoi nga afër kreun e partisë, Sali Shehu. “Dilni nga zyrat ose do t’ju çoj në burg me duart e mia”-u shpreh Meta me tone të ashpra, ndërsa përplasja fizike ka vijuar derisa të gjithë dolën jashtë. Policët Bashkiakë kishin shkuar me qëllim që FRD-ja të lironte zyrat. 

Meta e konsideroi urdhrin për lirimin e zyrave të FRD-së dhe përplasjen me policinë si "grusht shteti”.